‘त्या’ गाळेधारकांना लवकरच बिलवाटप

म. टा. प्रतिनिधी, जळगाव

महापालिकेच्या मालकीच्या मुदत संपलेल्या १८ व्यापारी संकुलातील गाळेधारकांकडे पाच वर्षांची बिले थकीत आहेत. रेडीरेकनरनुसार बिलांची निश्‍चित करण्यात आलेली आकारणी नगरविकास विभागाकडून पडताळणी करण्यात आली असून, बिलांच्या वाटपाची प्रक्रिया प्रशासनाकडून केली जाणार आहे.

मनपा मालकीच्या २८ व्यापारी संकुलांपैकी १८ व्यापारी संकुलातील गाळ्यांची मुदत २०१२मध्ये संपुष्टात आली. तेव्हापासून आजतागायत गाळेधारकांकडे भाडे थकीत आहेत. मुदत संपलेल्या व्यापारी संकुलातील गाळे पुन्हा लिलावाद्वारे कराराने दिले जाणार आहे. मात्र, त्यासाठी गाळेधारकांना थकीत भाडे भरावे लागणार आहे. लवकरच लिलावाची प्रक्रिया केली जाणार असल्याचे संकेत प्रशासनाकडून दिले जात आहे. अद्यापही थकबाकी वसुली करण्यासाठी बिले दिली गेली नाहीत. २०१२पासून आजतागायत भाडे वसूल करण्यासाठी रेडीरेकनरनुसार आकारणी करण्यात आली आहे. मुंबई येथे झालेल्या बैठकीत मनपा प्रशासनाने निश्‍चित केलेल्या रक्कमेची पडताळणी नगरविकास विभागाकडून करण्याची सूचना पालकमंत्री चंद्रकांत पाटील यांनी दिली होती. त्यानुसार मनपा प्रशासनाने पडताळणीसाठी पाठविल्यानंतर योग्य आकारणी असल्याचे नगरविकास विभागाने कळविले आहे.