गाळेधारकांच्या याचिकेवर ५ मे रोजी कामकाज

म. टा. प्रतिनिधी, जळगाव

जळगाव मनपा मालकीच्या मुदत संपलेल्या व्यापारी संकुलातील गाळेधारकांना मनपा प्रशासनाने बजावलेल्या ८१ ब या आदेशाच्या विरोधात जिल्हा न्यायालयात सहा मार्केटमधील १८७ गाळेधारकांनी दाखल केलेल्या याचिकेवर येत्या ५ मे रोजी अंतिम सुनावणी होणार आहे.

गाळेधारकांनी जिल्हा न्यायालयात दाखल केलेली याचिकेवर शुक्रवारी, न्या. सविता बारणे यांच्या न्यायालयात कामकाज होणार होते. मात्र, शुक्रवारी याबाबत कोणतेही कामकाज झाले नाही. गुरुवारी, महात्मा फुले, सेंट्रल फुले व महात्मा गांधी मार्केटमधील गाळेधारकांची याचिका न्यायालयाने फेटाळून लावली होती. तर दुसऱ्या दिवशी जुने छत्रपती शाहू महाराज मार्केट, नवीन छत्रपती शाहू महाराज मार्केट,जुन्या बीजे मार्केट, गेंदालाल मिल मार्केट, नानीबाई अग्रवाल मार्केट व धर्मशाला मार्केटमधील १८७ गाळेधारकांच्या याचिकेवर कामकाज होणार होते. मनपातर्फे जिल्हा सरकारी वकील अ‍ॅड. केतन ढाके तर गाळेधारकांतर्फे अ‍ॅड. दिलीप मंडोरे, अ‍ॅड. तपन थत्ते हे काम पाहत आहेत.