पाणीपुरवठा योजनेच्या कामांना वेग

पाच ठिकाणी कामे सुरू; पावसाळ्यापूर्वी खोदकाम पूर्ण करणार

म. टा. प्रतिनिधी, जळगाव

अमृत योजनेतून जळगाव शहरातील पाणीपुरवठा योजनेच्या कामास सुरुवात झाली आहे. शहरात एकाच वेळी पाच ठिकाणी कामे सुरू करण्यात आली आहे. यामध्ये विस्तारित भागातील जलवाहिन्यांसह जलकुंभाच्या कामांना वेग आल्याची माहिती योगेश बोरोले यांनी दिली.

जळगाव महापालिकेला शहरासाठी २४९ कोटी रुपयांची पाणीपुरवठा योजना मंजूर करण्यात आली आहे. पहिल्या टप्प्यात १९१ कोटी ८६ लाख रुपयांच्या निधीतून जलवाहिन्या व नवीन ७ जलकुंभ बांधण्याचे काम सुरू करण्यात आले. खोदकामासह शहरात जलकुंभांच्या कामांनाही सुरुवात झाली असून, निमखेडी परिसरातून जलवाहिनीसाठी खोदकाम सुरू झाले आहे. निमखेडी भागासह पिंप्राळा, खंडेराव नगर व रायसोनी नगरातील काही भागातही जलवाहिनीसाठी खोदकाम सुरू आहे. पावसाळ्यात नेहमी पाणी साठण्याचा प्रश्न निर्माण होतो. त्यामुळे विस्तारित भागातील कच्च्या स्त्यांचे खोदकाम करून पावसाळ्याचा आधी जलवाहिनी टाकण्याचे काम पूर्ण करण्यासाठी प्रयत्न केला जात आहे.

जलकुंभाच्या कामासही वेग
जलवाहिनी टाकण्यासोबतच अमृत योजनेतंर्गत शहरात पाण्याचा साठा तसेच वितरण करण्यासाठी शहरात सुप्रीम कॉलनी, रेमंड कंपनी परिसर, नित्यानंदनगर, निमखेडी, गेंदालाल मिल अशा सात ठिकाणी नवे जलकुंभ उभारण्यात येणार आहे. त्यापैकी सुप्रीम कॉलनी, रेमंड कंपनी परिसरात जलकुंभ तयार करण्याचा कामाला सुरुवात झाली असून, निमखेडी भागात येत्या आठवड्याभरात जलकुंभाच्या कामांना सुरुवात होणार असल्याची माहिती योगेश बोरोले यांनी दिली.