बाळाला सोडून माता पसार

म. टा. प्रतिनिधी, जळगाव

अवघ्या सात दिवसांच्या बाळाला सिव्हिल हॉस्पिटलमध्ये सोडून जन्मदात्री माता पसार झाल्याची घटना मंगळवारी सकाळी घडली. पुरुष जातीचे नवजात बालक सोडून जाणारी माता हॉस्पिटलच्या सीसीटीव्ही कॅमेऱ्यात कैद झाली आहे.

मंगळवारी सकाळी ७.३० वाजेच्या सुमारास एक महिला जिल्हा रूग्णालयात नवजात बाल कक्षाजवळ आली. लिफ्टच्या शेजारी काहीकाळ ती बाळाला घेऊन बसली. यानंतर याठिकाणी बसलेल्या दुसऱ्या महिलेला मी बाहेर जाऊन येते असे सांगत महिला बाळाला सोडून गेली. अर्धा तासानंतर महिला परत न आल्याने संबंधित महिलेने मंगला पवार व रियाना शेख यांना संबंधित प्रकार सांगितला. त्यावरून या महिलांनी घटनेची माहिती पोलिसांना दिली.

या सातवर्षीय बाळाला नजवात बालकक्षातील पेटीत ठेवण्यात आले आहे. जिल्हापेठचे पोलिस उपनिरीक्षक मनोज ठाकरे, सहाय्यक फौजदार सुभाष पवार यांनी भेट दिली असून याप्रकरणी पारिचारिका विमल चौधरी, लता पवार यांचे जबाब नोंदविले. यानंतर पोलिसांनी जिल्हा शल्य चिकित्सक शेळके यांची भेट घेतली. सीसीटीव्ही फुटेजच्या साहाय्याने महिलेचा शोध घेण्यात येत असल्याची माहिती पोलिसांनी दिली आहे.