इंद्रप्रस्थ नगरात ३ लाखाची धाडसी चोरी

आईसह माहेरवाशीणचे ११ तोळे सोने लंपास

म. टा. प्रतिनिधी, जळगाव

अमळनेर येथील लग्न समारंभ आटोपून रात्री साखरझोपेत असलेल्या कुटुंबीयांच्या घराचे आतून लावले कुलूप चोरट्यांनी तोडले. त्यानंतर घरात घ्‍ाुसून माहेरी आलेल्या मुलीसह तिच्या आईचे सुमारे ११ तोळे सोन्याचे दागिने व १० हजार रुपयांची रोख रक्कम चोरून नेली. खिश्यात ६ हजार रुपये असलेल्या दोन पॅण्टही चोरटे घेऊन गेले. ही धाडसी चोरी इंद्रप्रस्थ नगरातील रहिवाशी हेमंत दत्तात्रय बडगुजर यांच्या घरात शनिवारी (दि. २७) रात्री झाली.

जिल्हा न्यायालयातील वरिष्ठ लिपीक हेमंत बडगुजर पत्नी सुनंदा, मुलगा अतुल, मुलगी दीपाली व नातू आदित्य यांच्यासह शुक्रवारी (दि. २६) अमळनेर येथे सालीच्या मुलीच्या लग्नासाठी गेले होते. लग्न समारंभ आटोपून शनिवारी (दि. २७) रात्री १० वाजता घरी परतले.

लग्नसंभारंभातील दगदगीने थकलेल्या कुटुंबीयांनी लग्नात घातलेले दागिने काढून दोन पर्समध्ये ठेवले होते. या पर्स बेडजवळच असलेल्या टी-पॉयवर ठेवल्या होत्या. घराचा मुख्य दरवाजा उघडाच ठेवून लोखंडी ग्रीलला मात्र आतून कुलूप लावले होते. सर्वजण पाच खोल्यांच्या घरामधील एकाच बेडरुममध्ये झोपले. लोखंडी ग्रीलचे आतील कुलूप तोडून चोरट्यांनी घरात प्रवेश केल्याचा संशय आहे. चोरट्यांनी घरात येऊन झोपलेल्या सदस्यांना चाहूल लागू न देता या सोन्याचे दागिने असलेल्या दोन पर्स, हुकला अडकवलेली हेमंत बडगुजर व अतुल यांची पॅण्ट लांबवली. दोन्ही पर्समध्ये दोन मुगलपोत, दोन जोड कानातले, दोन हार असे एकूण ११ तोळे सोन्याचे दागिने व चार हजार रुपये रोख होते. हेमंत बडगुजर यांच्या पॅण्टमध्ये ६ हजार रुपये तर अतुलच्या पॅण्टमध्ये ५०० रुपये व काही महत्त्वाचे कागदपत्र, एटीएम कार्डही होते.

सकाळी बसला धक्का

रविवारी सकाळी ६ वाजता हेमंत बडगुजर हे झोपेतून जागे झाले. लोखंडी ग्रीलचा दरवाजा उघडा असल्यामुळे ते घराबाहेर गेले. त्यांनी पत्नी सुनंदा यांना झोपेतून उठवले. त्यांना घराच्या अंगणात एक पर्स फेकलेली दिसून आली. याचवेळी सुनंदा बडगुजर यांना घरात चोरी झाल्याचा संशय आला. त्यांनी पर्स ठेवलेला टेबल गाठून तपासणी केली. सर्व कुटुंबीयांना घरात तपासणी केली असता, चोरट्यांनी दोन पर्स, दोन पॅण्ट नेल्याचे आढळून आले. तर एक पर्स काढून नेत अंगणात फेकून दिली होती. या प्रकारामुळे बडगुजर कुटुंबीयांना धक्का बसला. बेडरुमध्येच भिंतीवर अडकवलेल्या फॅन्सी झोल्याच्या खिशात सुनंदा बडगुजर यांच्या दहा ग्रॅम वजनाच्या पाटल्या होत्या. सुदैवाने चोरट्यांना शोधता न आल्यामुळे पाटल्या सुरक्षित राहिल्या.