जिल्हा बँकेच्या २१० कोटींच्या नोटा बदलणार

म. टा. प्रतिनिधी, जळगाव

जिल्हा मध्यवर्ती सहकारी बँका आणि पोस्ट ऑफिसमध्ये पडून असलेल्या जुन्या पाचशे, हजारच्या नोटा रिझर्व्ह बँक ऑफ इंडियाच्या जाहीर निर्णयामुळे स्वीकारणार आहे. यामुळे जळगाव जिल्हा बँकेलादेखील दिलासा मिळणार आहे. २१० कोटींच्या नोटा बदलून मिळणार आहे.

चलनातून ५०० आणि १००० च्या नोटा ८ नोव्हेंबर २०१६ रोजी रद्द करण्यात आल्या. त्यानंतर ३० डिसेंबर २०१६पर्यंत बँकांमध्ये आणि पोस्ट ऑफिसमध्ये जमा केलेल्या नोटा रिझर्व्ह बँकेच्या कोणत्याही कार्यालयात स्वीकारल्या जातील, असे अर्थ मंत्रालयाने म्हटले आहे. जिल्हा बँकांमध्ये कोट्यवधी रुपयांची रक्कम पडून असून, शेतकऱ्यांना पीककर्ज देणेही बँकांना कठीण झाले आहे. त्या पार्श्वभूमीवर जिल्हा बँकांसाठी हा निर्णय दिलासादायक मानता येईल. जळगाव जिल्हा बँकेकडे देखील पाचशे, हजारच्या नोटांच्या स्वरूपात सुमारे २१० कोटी रुपयांची रक्कम अडकून पडल्याने बँकेची परिस्थिती बिकट झाली होती. सरकारच्या या निर्णयामुळे जळगाव जिल्हा बँकेला दिलासा मिळणार असून, ती रक्कम मोकळी झाल्यावर शेतकऱ्यांना पीक कर्ज देण्यासाठी बँकेला मदत होणार आहे.