गाळेधारकांवर आता वार्षिक २४ टक्क्यांची मात्रा?

म. टा. प्रतिनिधी, जळगाव

जळगाव महापालिकेच्या मुदत संपलेल्या मार्केटमधील गाळेधारकांकडील थकीत भाड्यावर पाचपटऐवजी वार्षिक २४ टक्के दंड आकारण्याचा निर्णय सरकारच्या नगरविकास विभागाकडून घेतला जाण्याची शक्यता आहे. तसेच मुदत संपलेल्या गाळ्यांचा लिलाव करण्याची शासनाची मानसिकताही असल्याचे वृत्त सूत्रांकडून आले आहे.

जळगाव पालिकेच्या मालकीच्या १८ व्यापारी संकुलातील १३८७ गाळ्यांची मुदत २०१२ मध्ये संपुष्टात आली आहे. त्याबाबत गाळे कराराने देण्याबाबत १३५ क्रमांकाचा ठराव करण्यात आला होता. तसेच प्रलंबित गाळे भाडेपोटी पाचपट दंड आकारणीचा ४० क्रमांकाचा ठरावही केला आहे. परंतु, या दोन्ही ठरावांना गाळेधारकांनी हरकत घेतल्यामुळे मुख्यमंत्र्यांनी स्थगिती देवून नगरविकास राज्यमंत्र्यांना सुनावणी घेण्याचे आदेश दिले होते. त्यानुसार सुनावणीदेखील पार पडली परंतु, त्याबाबतचा निर्णय राखून ठेवला आहे. तर दुसरीकडे औरंगाबाद खंडपीठाने गाळे ताब्यात घेण्यासाठी दोन महिन्यांची मुदत दिली आहे.

या सर्व घटनाक्रमानंतर गाळेधारकांमध्ये गोंधळाची स्थिती निर्माण झाली आहे. दि. ११ ते १४ सप्टेंबरपर्यंत गाळे ताब्यात करण्याची प्रक्रिया प्रशासनातर्फे राबविण्यात येणार आहे. महात्मा फुले व सेंट्रल फुले मार्केटसह चार व्यापारी संकुलाच्या जागेवर महसूल विभागाने दावा केला आहे. गाळे ताब्यात घेताच गाळ्यांचे लिलाव करण्याचे हालचाल देखील मंत्रालयात सुरू करण्यात आली असल्याचे समजते. तसेच २०१२ ते २०१७ पर्यंत पाच वर्षांचे भाडे दरवर्षाच्या रेडीरेकनरनुसार आणि दरमहा २ टक्के शास्ती आकारण्याची हालचालदेखील मंत्रालयात सुरू झाल्याचे वृत्त आहे.