महिला सक्षमीकरणासह तंत्रज्ञानावर भर

जनता बँकेच्या सभेत अध्यक्ष अनिल राव यांची माहिती

म. टा. प्रतिनिधी, जळगाव

बँकेचे संस्थापक अध्यक्ष डॉ. अविनाश आचार्य यांनी घालून दिलेल्या आदर्शांवर बँकेची प्रगती सुरू आहे. समाजातील शेवटच्या घटकाला सक्षम करण्याचा बँकेचा प्रयत्न असून, महिला सक्षमीकरण व तंत्रज्ञानावर बँकेचा भर असल्याची माहिती जळगाव जनता बँकेचे अध्यक्ष अनिल राव यांनी आज बँकेच्या ४० व्या वार्षिक सर्वसाधारण सभेत दिली.

संत बाबा हरदासराम मंगल कार्यालयात झालेल्या वार्षिक सर्वसाधारण सभेस २००० सभासद उपस्थित होते. अध्यक्षीय मनोगतात अनिल राव यांनी बँकेच्या सभासद, ग्राहक व महिला बचतगटाच्या सभासद महिलांसाठी नवीन योजनांची घोषणा केली. यात महिलांना स्वावलंबी बनविण्याच्या दृष्टीने बँक गृह कर्जातील व्याज दरात महिलांना १ टक्का सूट, महिला बचतगट सदस्य महिलांनी जर १२ वी नंतरचे शिक्षण घेतले तर त्याचा निम्मा खर्च बँकेमार्फत अदा केला जाईल. २०२० पर्यंत सर्व सुविधांनी युक्त अशी बँकेची स्वमालकीची मुख्य कार्यालयाची वास्तू ग्राहकांच्या सेवेत सुरू होणार असल्याची माहितीही यावेळी देण्यात आली. संघ भावना, अढळ विश्वास व सामूहिक निर्णय या त्रिसूत्रीवर बँक काम करीत असल्याचे राव म्हणाले. केशवस्मृती प्रतिष्ठानचे अध्यक्ष भरत अमळकर यांनी आपल्या मनोगतात बँक समाजाचे आपण देणे लागतो या भावनेने काम करीत असल्याचे सांगितले.

महावीर सहकारी बँकेचे अध्यक्ष दलीचंद हस्तीमल जैन यांच्यासह दि. जळगाव पीपल्स बँक रामदास पाटील स्मृती सेवा ट्रस्ट या संस्थेचा या वेळी सत्कार करण्यात आला. २०१७-१८ या वर्षासाठी सभासदांना १० टक्के लाभांश देण्यास मंजुरी घेण्यात आली. आभार उपाध्यक्ष डॉ. प्रताप जाधव यांनी मानले. या वेळी बँकेचे माजी अध्यक्ष संजय बिर्ला, माजी संचालक, शाखांचे स्थानिक सल्लागार व सभासद मोठ्या संख्येने उपस्थित होते.