अभियंता निलंबनाचा अहवाल मागविला

म. टा. प्रतिनिधी, जळगाव

महापालिकेच्या निलंबित सहा अभियंत्यांना सेवेत पुन्हा रूजू करून घेण्यासाठी उपायुक्तांना लाच घेताना अटक झाली होती. त्यानंतर या प्रकरणाशी संबंधित फाइल लाचलुचपत प्रतिबंधक विभागाने आपल्या ताब्यात घेतली होती. ही फाईल नुकतीच महापलिकेला परत मिळाली असून, आयुक्तांनी या फाइलवर आस्थापना विभागाकडून मुद्देसूद माहिती मागविली आहे.

महापालिकेच्या नगररचना विभागातील अभियंते अरविंद भोसले, गोपाळ लुल्हे, संजय पाटील, सतीश परदेशी, नरेंद्र जावळे व योगेश वाणी यांनी महासभेचा अपमान केल्याच्या आरोप करत त्यांच्या निलंबनाचा ठराव महासभेने केला होता. त्यानुसार पुढे प्रशासनाने कार्यवाही केली. या अभियंत्यांनी केलेला खुलासा तत्कालीन आयुक्त संजय कापडणीस यांनी मान्य केला होता. मात्र, अभियंत्यांना पुन्हा रुजू करून घेण्यापूर्वीच आयुक्त व उपायुक्त यांची बदली झाली. नूतन आयुक्त व उपायुक्त आल्यानंतर निलंबित अभियंत्यींनी पुन्हा अर्ज करून, प्रशासनाने त्यांना रूजू करून घ्यावे, अशी विनंती केली. त्यासाठी सकारात्मक टिपणी लिहिण्यासाठी ५० हजार रुपयांची लाच घेताना उपायुक्त राजेंद्र फातले यांना लाचलुचपत प्रतिबंधक विभागाने अटक केली होती. या कारवाईनंतर लाचलुचपत प्रतिबंधक विभागाने अभियंता निलंबन प्रकरणाची फाईल चौकशीसाठी ताब्यात घेतली होती. १७ ऑक्टोबरला ही फाइल पुन्हा आयुक्तांच्या ताब्यात देण्यात आली आहे. या फाइलवर निर्णय घेण्यापूर्वी आयुक्त जीवन सोनवणे यांनी संपूर्ण प्रकरणाच्या क्रमानुसार मुद्देसूद माहिती आस्थापना विभागाकडून मागविली आहे. सोमवार (दि.२४) पर्यंत ही माहिती त्यांना देण्यात येणार आहे.