हायमस्ट लॅम्पसाठी २८ लाख मंजूर

मनपाच्या स्थायी सभेत निर्णय

म. टा. वृत्तसेवा, जळगाव

मनपाच्या मंगळवारी (दि. ३०) झालेल्या स्थायी समितीच्या बैठकीत विविध विषयांवर चर्चा करण्यात आली. त्यामध्ये मनपाच्या आरोग्य विभागातील सर्व वाहनांवर जीपीआरएस प्रणाली लावण्यासह शहरातील मेहरुण तलावावर हायमास्ट लॅम्प लावण्यासाठी २८ लाख ८० हजार रुपयांच्या खर्चास सर्वानुमते मंजूरी देण्यात आली.

मनपा स्थायी समितीची सभा मंगळवारी (दि. ३०) सभापती नितीन बरडे यांच्या अध्यक्षतेखाली झाली. व्यासपीठावर आयुक्त जीवन सोनवणे, उपायुक्त राजेंद्र फातले, सहाय्यक आयुक्त लक्ष्मीकांत कहार, नगरसचिव निरंजन सैंदाणे उपस्थित होते. ३८० केव्हीए क्षमतेचे असलेल्या जनरेटरची दुरुस्ती करण्यासाठी १,७५,६३८ रुपयांच्या खर्चालाही मान्यता देण्यात आली.

तसेच पाणी पुरवठ्याच्या गिरणा टाकी येथील मोटर दुरुस्तीबाबतचा विषय मंजूर करण्यात आला. राजीव गांधी आवास योजनेअंतर्गत शहराचा अहवाल करण्यासाठी नेमण्यात आलेल्या कन्सल्टंटना कार्यादेश व करारनामा रद्दचा प्रस्ताव मंजूर करण्यात आला. तसेच गणपती विसर्जनापूर्वी खड्डे बुजविण्याचे काम करण्याची मागणीदेखील करण्यात आली. वॉर्डामध्ये स्वच्छता केली जाते मात्र कचरा कुंड्यांतील कचरा उचलला जात नाही. त्यामुळे दुर्गंधी पसरत असल्यामुळे नागरिकांच्या तक्रारी असल्याचे पृथ्वीराज सोनवणे यांनी निर्दशनास आणून दिले. यावर सभापती नितीन बरडे यांनी आरोग्य निरीक्षक यांच्याकडे तक्रार करण्याची सूचना केली.

आयुक्तांनी सदस्यांना रोखले

स्थायी सभेत राजीव आवास योजने अंतर्गतच्या विषयावर सदस्यांनी वॉर्डातील कामे होत नसल्याबाबत खंत व्यक्त केली. यावेळी आयुक्त जीवन सोनवणे यांनी सदस्याचे बोलणे थांबवून सभेत तुम्हाला बोलण्याचा अधिकार आहे. पण आधी विषयपत्रिकेवर चर्चा व्हावी नंतर आपले प्रश्न सभेत मांडावे त्यामुळे सभागृहाचा वेळ वाया जाणार नाही, अशी सूचना त्यांनी केली. आयुक्तांनी केलेल्या या सूचनेमुळे सदस्यांनी दबक्या आवाजात नाराजी व्यक्त केली.