महापौरांनीच दिले करोना रुग्णांना योगाचे धडे

म. टा. प्रतिनिधी, जळगाव: करोनाशी लढा देण्यासाठी स्वतःची रोग प्रतिकारक क्षमता मजबूत करणे आवश्यक आहे. एरव्ही करोनाच्या धास्तीने अनेक दिग्गज घरात बसून असताना जळगाव मनपाच्या महापौर भारती सोनवणे करोना पॉझिटिव्ह रुग्ण आणि विलगीकरण केलेल्या व्यक्तींना योगाचे प्रशिक्षण देत आहेत. आज जागतिक योग दिनानिमित्त महापौर व योगशिक्षिका हेमांगिनी सोनवणे यांनी कोविड केअर सेंटरमध्ये दाखल रुग्णांना योगाचे महत्व पटवून दिले.

वाचाः गुडन्यूज! 'या' जिल्ह्याची करोनामुक्तीकडे वाटचाल; सध्या केवळ ५० रुग्ण

करोनाला दूर सारण्यासाठी रोग प्रतिकारक क्षमता वाढविणे आवश्यक आहे. रुग्णांसाठी महापौर भारती सोनवणे व योगशिक्षिका हेमांगिनी सोनवणे या सकाळीच ६.३० वाजता कोविड केअर सेंटरला पोहचतात. सर्व पॉझिटिव्ह रुग्णांना इमारतीच्या गॅलरीत तसेच विलगीकरण केलेल्या व्यक्तींना खोलीच्या खिडकीत उभे राहण्यास सांगण्यात येते. महापौर भारती सोनवणे आणि योगशिक्षिका हेमांगिनी सोनवणे माईकद्वारे योगाविषयी सूचना देतात.

वाचाः करोनाचा हॉटस्पॉट ठरलेल्या धारावीत 'हा' शिक्षक असा ठरला करोना योद्धा

सहा प्रकारच्या योगाचे प्रशिक्षण

रोगप्रतिकारक क्षमता वाढावी आणि श्वसनसंस्था मजबूत होऊन शरीरात अधिकाअधिक प्राणवायूचा संचार व्हावा यासाठी महापौर सोनवणे व योगशिक्षिका हेमांगिनी सोनवणे रुग्णांकडून ६ प्रकारचा योगा करवून घेतात. त्यात ओंकार, दीर्घ श्वसन, अनुलोम विलोम, भ्रमर, कपालभाती, भसरीका या योगप्रकारांचा समावेश असतो.

जागतिक योग दिवस साजरा

करोनाच्या पार्श्वभूमीवर सर्वत्र जागतिक योग दिवस ऑनलाईन साजरा करण्यात आला. महापौर भारती सोनवणे आणि योगशिक्षिका हेमांगिनी सोनवणे यांनी मात्र कोरोना पॉझिटिव्ह व विलगीकरण केलेल्या रुग्णांसोबत जागतिक योग दिवस साजरा केला. सर्वांना योगाचे महत्त्व पटवून देत घरी दररोज योगा करावा असे आवाहन त्यांनी केले.

वाचाः २० जवानांच्या हत्येचा बदला मोदी सरकार कसा घेणार? संजय राऊतांचा सवाल