मनपाची महासभा गाजणार

शनिवारी सभा; रस्ता हस्तांतरण, मोफत सरपण ऐरणीवर

म. टा. प्रतिनिधी, जळगाव

शहरातील सहा राज्यमार्ग सरकारने महापालिकेकडे हस्तांतरित केले आहेत. या रस्त्यांबाबत भूमिका ठरविणे, स्वयंसेवी संस्थांना दिलेल्या ओपन प्लेसचे ठराव रद्द करणे यासह महत्त्वाच्या विषयांवर शनिवारी (दि. २९) होणाऱ्या महासभेत चर्चा होणार आहे. त्यामुळे महिनाभराच्या खंडानंतर होणारी ही महासभा गाजण्याची शक्यता आहे.

महापालिकेच्या सतरा मजली प्रशासकीय इमारतीमध्ये शनिवारी (दि. २९) सकाळी ११ वाजता महापौर नितीन लढ्ढा यांच्या अध्यक्षतेखाली महासभा होणार आहे. गेल्या एक महिन्याच्या खंडानंतर महासभा होत असल्याने महासभेच्या विषयपत्रिकेवर २१ प्रशासकीय तर एक शासकीय प्रस्ताव आहेत. त्यामध्ये अनेक महत्त्वाच्या विषयांवर चर्चा होणार असल्याने सत्ताधारी व विरोधी भाजप गटात सभेत जोरदार खडाजंगीची शक्यता निर्माण झाली आहे. त्यानुसार दोन्ही गटांनी तयारीही सुरू केली आहे.

मोफत सरपणाचा विषय

शहरातील स्मशानभूमीमध्ये मोफत सरपण व दफनभूमीत मोफत बरगे पुरविण्याबाबत यापूर्वीदेखील प्रस्ताव महासभेत ठेवण्यात आला होता. आमदार सुरेश भोळे यांच्या पाठपुराव्यामुळे पुन्हा हा विषय महासभेत ठेवण्यात आला आहे. त्यास सभागृहात मान्यता देण्यात येणार आहे.

‘अमृत’च्या प्रोत्साहन निधीचा वापर

अमृत योजनेसाठी महापालिकेला प्रोत्साहन निधी ३३ लाख ४४ हजार इतका मिळाला आहे. अमृत योजनेसाठी स्वहीस्सा म्हणून हा निधीस मान्यता घेण्यात येणार आहे. जळगाव शहर महापालिकेच्या मंजूर डीपी अर्थात विकास आराखड्याची मुदत सन २०१३ मध्ये संपली आहे. नवीन २० वर्षांची विकास योजना तयार करण्यासाठी युनिट मागवण्यासाठी त्या खर्चाचा प्रस्ताव महासभेत ठेवण्यात आला आहे.

या विषयांचा समावेश

सभेत सफाई कर्मचारी यांना शासकीय सुट्या देणे, डॉ. आंबेडकर मार्केटमधील हॉलचे रोजगार व उद्योजक केंद्रास नूतनीकरण करून देणे, आरक्षण बदलाचे ठराव, बालगंधर्व नाट्यगृहाच्या अमानत रकमेत वाढ करणे, महामार्गावर हॉकर्सला पर्यायी जागा देणे, भूसंपादनाचा प्रस्ताव, कॅशलेस भरणा व घनकचरा प्रक्रिया करणाऱ्या मालमत्ताधारकांना सूट देणे, घंटागाड्यात बदल करणे, वित्त आयोगातून ८ कामे करणे, गोलाणी मार्केटच्या लेखा परिक्षणाची माहिती घेणे या विषयांचादेखील समावेश आहे. त्यामुळे या महासभेकडे सर्वांच्या नजरा लागल्या आहेत.