अंदाजपत्रकासह स्थायी समितीच्या आज दोन सभा

म. टा. प्रतिनिधी, जळगाव

जळगाव महानगरपालिकेचे सन २०१७-२०१८ साठी करवाढ नसलेले ५९३ कोटी ९५ लाख रुपयांचे अंदाजपत्रक आयुक्त जीवन सोनवणे यांनी विशेष स्थायी समिती सभेत सादर केले होते. अभ्यास करण्यासाठी ही सभा तहकूब करण्यात आली होती. ही सभा आज (दि. २०) सकाळी ११ वाजता होत आहे. यात सभापती सुधारित अंदाजपत्रक मांडण्यात येणार आहे. यानंतर दुपारी १२ वाजतादेखील एक सभा होणार आहे.

स्थायी समितीची विशेष सभा दि. २० फेब्रुवारीला सभापती वर्षा खडके यांच्या अध्यक्षतेखाली घेण्यात आली होती. यावेळी आयुक्त जीवन सोनवणे यांनी आयुक्तांनी सन २०१७-१८ साठी ५९३ कोटी ९५ लाख रुपयांचे अंदाजपत्रक सादर केले. यात शासकीय योजना व अनुदानाचा समावेश करण्यात आल्याचे आयुक्तांनी सुरुवातीलाच स्पष्ट केले होते.

अंदाजपत्रकात कुठलीही करवाढ करण्यात आलेली नाही. कर्जफेडीमुळे महापालिकेची आर्थिक परिस्थिती बिकट असल्याने नागरिकांना चांगल्या सुविधा देता येत नसल्याने करवाढ करणे योग्य होणार नाही, असे आयुक्त सोनवणे यांनी सांगितले. करवाढ केली नसली तरी कर आकारणीतील तफावत दूर करण्याची प्रक्रिया सुरू राहणार आहे. जीपीएसच्या साहाय्याने मालमत्तांचे सर्वेक्षण होणार आहे. सभेत अंदाजपत्रकावर चर्चेनंतर सुधारणा करून मान्यता देण्यात येणार आहे.