लेखापरीक्षण समितीचा मनपा निधीवर ठपका

आक्षेपांचीच पूर्तता करण्याच्या सूचना

म. टा. प्रतिनिधी, जळगाव

महापालिकेच्या सन २०१४-१५ या आर्थिक वर्षाचे लेखा परीक्षण करण्यात आले होते. या लेखा परीक्षणात मनपा प्रशासनाने १७ कोटी ७३ लाख ५५ हजार ६८२ रुपयांच्या अग्रीम रकमेवर आक्षेप नोंदविण्यात आले आहेत. दरम्यान, २२९ आक्षेपांपैकी प्रशासनाने केवळ ९७ आक्षेपांची पूर्तता केली आहे.

महापालिकेच्या २०१४-१५ आर्थिक वर्षातील लेखा परीक्षण करण्यात आले होते. लेखा परीक्षक समितीने लेखा परीक्षणानंतर २२९ आक्षेप नोंदविले असून, या आक्षेपांची पूर्तता करण्यासाठी महापालिकेला अर्धसमास पत्रदेखील दिले होते. त्यानुसार मनपा प्रशासनाने केवळ ९७ आक्षेपांची पूर्तता केली आहे. अनियमितता आणि नियमबाह्य खर्च झाल्याचा ठपका लेखा परीक्षण अहवालात ठेवण्यात आला आहे. त्यामुळे लेखा परीक्षण समितीतील अधिकारी महापालिकेत आले होते. त्यांनी अधिकाऱ्यांची बैठक घेऊन आक्षेपांची पूर्तता करण्याची सूचना दिली.

हे आहेत आक्षेप
२ कोटी ३० लाख ५४ हजार ३०० रुपये जादा खर्च केल्याचा आक्षेप
१७ कोटी ७३ लाख ५५ हजार ६८२ रुपयांची अग्रीम रक्कम प्रलंबित
मनपाचा निधी अडकून पडल्याचा ठपका
मनपा दवाखान्यातील औषध निर्माता, परिचारिका, लॅब टेक्निशियन पदांना जादा ग्रेड वेतन मंजूर केल्याची नोंद