महापौर निवडीला वेग

सत्ताधारी खाविआ, मनसेकडे स्पष्ट बहुमत; भाजपनेही नेलेत अर्ज

म. टा. प्रतिनिधी, जळगाव

महापालिकेच्या महापौर पदासाठी निवडीसाठी मंगळवार (दि. ३०) पासून निवडीची प्रक्रिया सुरू करण्यात आली आहे. त्यामुळे जळगाव महापालिकेत राजकीय हालचालींना वेग आला आहे. खाविआ, मनसे व राष्ट्रवादीने एकत्रितरित्या महापौर निवडीसाठी मनसेचे ललित कोल्हे यांचे नाव जाहीर केले आहे. त्या पार्श्वभूमीवर खाविआ व मनसेचे व्हीपदेखील जाहीर केले आहेत. तर दुसरीकडे भाजपनेही नामनिर्देशन पत्र नेल्याने आता या निवडीकडे सर्वांचे लक्ष लागले आहे.

जळगाव महापालिकेचे खान्देश विकास आघाडीचे नितीन लढ्ढा यांनी नेते माजी आमदार सुरेश जैन यांच्या आदेशाने पदाचा राजीनामा दिला होता. त्या रिक्त जागेसाठी लगेच विभागीय आयुक्तांनी जिल्हाधिकारी किशोर राजे निंबाळकर यांना प्राधिकृत केल्यानंतर महापौर निवडीचा कार्यक्रम जाहीर केला आहे. त्या कार्यक्रमानुसार दि. २९ ऑगस्टपासून नामनिर्देशनपत्र वितरण व स्वीकारण्यास सुरुवात करण्यात आली आहे. परिणामी, राजकीय पक्ष तयारीला लागलेले दिसून येत आहेत.

महापालिकेत सध्या मनसे व राष्ट्रवादीच्या पाठींब्यावर खान्देश विकास आघाडीची सत्ता आहे. खाविआने मनसेचे समर्थन घेताना शेवटच्या वर्षात महापौरपद देण्याचे या अगोदर आश्वासन दिले होते. त्यानुसार आता महापौरपदावर मनसेचे ललित कोल्हे यांना उमेदवारी देण्यात येणार आहे. खाविआ व मनसेच्या सदस्यांची संख्या पाहता त्यांच्याकडे स्पष्ट बहुमत असल्याने कोल्हे यांची निवड निश्चित मानली जात आहे. मात्र तरीही भाजपकडून काय खेळी खेळण्यात येते हे पाहणे औत्सुक्याचे ठरणार आहे.


बहुमत असले तरी सध्याची राजकीय परिस्थिती लक्षात घेवून खान्देश विकास आघाडीने आज सर्व नगरसेवकांना व्हीप जारी केला आहे. त्यात दि. ७ आगस्ट रोजी होणाऱ्या महापौर निवडीच्या सभेत सर्व नगरसेवकांनी हजर राहणे आवश्यक आहे. तसेच पक्ष (खान्देश विकास आघाडी) निर्देशित केले त्या उमेदवारालाच मतदान करावे, असे व्हीपमध्ये म्हटले आहे. आघाडीचे नेते रमेश जैन यांच्या स्वाक्षरीनिशी हा व्हीप जारी करण्यात आला आहे. यानंतर महाराष्ट्र नवनिर्माण सेनेने देखिल त्यांच्या नगरसेवकांसाठी व्हीप काढला आहे. मनसेचे गटनेते ललित कोल्हे हेच महापौरपदाचे उमेदवार असल्याने त्यांनी जास्त काळजी घेतली आहे. शिवसेना व जनक्रांतीचेदेखील दोन उमेदवार असल्याने त्यांचाही व्हीप काढण्यात आला असल्याचे सांगण्यात आले.


या निवडणुकीत नामनिर्देशनपत्र मिळण्याच्या दुसऱ्या दिवशी खान्देश विकास आघाडीचे माजी महापौर सुनील महाजन यांनी मित्रपक्ष मनसेच्या ललित कोल्हे यांच्यासाठी चार नामनिर्देशन पत्र नेले आहेत. तर दुसरीकडे अपक्ष नगरसेवक व सध्या भाजपच्या गटात असलेले नवनाथ दारकुंडे यांनीदेखील १ नामनिर्देशन पत्र नेले आहे. त्यामुळे आता दारकुंडे यांनी महापौरपदासाठी अर्ज नेल्याने महापौर निवड बिनविरोध होण्याची शक्यता मावळली आहे.