नगररचनाच्या ४५ फायलींचा निपटारा

निवडणुकीनंतर कामांना वेग

म. टा. प्रतिनिधी, जळगाव

बांधकाम परवानगीसाठी नगररचना विभागात अनेक दिवसांपासून जवळपास १०० फायली प्रलंबित होत्या. त्यापैकी ३०० मीटरपेक्षा कमी बांधकाम परवानगीच्या ४५ फायलींचा निपटारा करण्यात आल्याची माहिती मनपा सूत्रांनी दिली.

इमारत बांधकाम करण्यापूर्वी महानगरपालिकेच्या नगररचना विभागाकडून बांधकाम परवानगी घेतली जाते. त्यासाठी जवळपास नगररचना विभागात १०० फायली जमा झाल्या होत्या. मनपा निवडणुकीच्या कामामुळे नगररचना विभागाचे सर्व अधिकारी व्यस्त होते. त्यामुळे सर्व फाइल्स प्रलंबित असल्याने ओरड होत होती. दरम्यान बुधवारी ३०० मीटरपेक्षा कमी बांधकाम परवानगीच्या ४५ फायलींचा निपटारा करण्यात आला आहे. तर ३०० मीटरपेक्षा अधिक बांधकाम परवानगीच्या जवळपास २५ फाइल प्रलंबित असल्याचे सूत्रांनी सांगितले.

उपायुक्त खोसे रजेवर
मनपा उपायुक्त चंद्रकांत खोसे हे रजेवर गेले आहेत. मनपा निवडणुकीचे सर्व कामकाज उपायुक्त चंद्रकांत खोसे यांच्याकडे होते. निवडणुकीनंतर त्यांनी रजा घेतली असून, ते रजेवर असताना त्यांच्या स्वीयसहाय्यकामार्फत दि. २० ऑगस्ट ते २१ सप्टेंबर या एक महिनाच्या कालावधीसाठी रजेचा अर्ज आयुक्तांकडे सादर करण्यात आला आहे. महापालिकेत आधीच अधिकारी नाही. त्यात उपायुक्त खोसे तब्बल एक महिनाच्या रजेवर जात असल्याने मनपा प्रशासनात आश्‍चर्य व्यक्त केले जात आहे.