आगामी महापौर सेनेचाच

खासदार संजय राऊत यांचा विश्वास; मनपा निवडणूक चिन्हावरच

म. टा. प्रतिनिधी, जळगाव

जळगाव महापालिकेच्या आगामी निवडणुकीत शिवसेनेचाच महापौर विजयी होईल, असा विश्वास शिवसेनेचे खासदार संजय राऊत यांनी व्यक्त केला. निवडणूक सेनेच्या चिन्हावरच लढविली जाईल. यंदा जळगाव लोकसभा मतदारसंघातदेखील आमचाच खासदार होईल, असेही खासदार संजय राऊत यांनी सांगितले.

शिवसेनेची उत्तर महाराष्ट्राची संघटनात्मक जबाबदारी खासदार संजय राऊत यांच्याकडे देण्यात आली आहे. त्या पार्श्वभूमीवर ते गुरुवारी (दि. ११) जिल्ह्याच्या दौऱ्यावर आले होते. या वेळी जळगावात झालेल्या पत्रकार परिषदेत त्यांच्यासोबत सहकार राज्यमंत्री गुलाबराव पाटील, संपर्कप्रमुख संजय सावंत, जिल्हाध्यक्ष गुलाबराव वाघ, आमदार किशोर पाटील आदी उपस्थित होते.

भाजपचे गिरीष बापट यांनी वर्षभरात निवडणुका होतील, असे सांगितले आहे. त्यामुळे निवडणुकीच्या तयारीला लागलो असल्याचे खासदार राऊत म्हणाले. महापालिकेच्या निवडणुकीसाठी उमेदवारांची चाचपणी, जिल्ह्यासह शहरात संघटनात्मक बांधणी यासाठी आपण दौरे करीत असल्याचे त्यांनी सांगितले. महापालिकेची आगामी निवडणूक शिवसेनेच्या चिन्हावरच लढवणार असून, महापौर हा सेनेचाच होईल, असा विश्वासही खासदार राऊत यांनी बोलताना व्यक्त केला.

सुरेश जैन यांच्याशिवाय विचारच नाही

लोकसभा निवडणुकीत माजी मंत्री सुरेश जैन यांना उमेदवारी देणार का? या प्रश्नावर सुरेश जैन यांची आज (दि. १२) भेट घेणार असल्याचे खासदार राऊत म्हणाले. जळगाव जिल्ह्यात सुरेश जैन यांच्याशिवाय शिवसेनेचा विचार करू शकत नसल्याचे ते म्हणाले. प्रत्येक निर्णयात त्यांच्याशी चर्चा केली जाईल, असेही त्यांनी सांगितले.

कर्जमाफी न झाल्यास होणार होता भूकंप

मागील दौऱ्यात पाचोरा येथे राजकीय भूकंपाचे भाकित केले होते. त्याचे काय? असा प्रश्नही खासदार राऊत यांना विचारला. त्यावर राज्यात कर्जमाफी न दिल्यास भूकंप होईल, असे आपण म्हटल्याचे त्यांनी सांगितले. कर्जमाफी झाली आहे मात्र त्याने शेतकरी समाधानी नाही, शिवसेनाही शेतकऱ्यांबरोबर असल्याचे ते म्हणाले. सत्तेत राहून काही गोष्टी शेतकरी हिताच्या सेना करून घेत आहे.

सत्ता बदलणे शक्य आहे मात्र, पर्याय नाही. शिवसेना स्वबळावर सत्तेत येणे हाच एक पर्याय असल्याचे खासदार राऊत म्हणाले. राज्यातील युतीबाबत विचारले असता, भाजपनेच लाटेच्या नादात युती तोडल्याचे ते म्हणाले. लोकसभा निवडणूक अगोदर होणार असून, त्यानंतर विधानसभा निवडणूक होईल. त्यामुळे जळगाव मतदारसंघात शिवसेनेचाच खासदार विजयी होईल. याबरोबरच रावेर लोकसभा मतदारसंघातही शिवसेना आपला देण्यासाठी पूर्ण प्रयत्न करेल, असेही खासदार संजय राऊत यांनी यावेळी बोलताना सांगितले.
राहुल गांधी भविष्यात देशाचे नेते

काँग्रेसचे अध्यक्ष राहुल गांधी यांनी गुजरात निवडणुकीत काँग्रेसला मिळवून दिलेल्या जागा या त्यांच्या नेतृत्वाची चुणूक दाखवून गेली. यातून त्यांची नेतृत्व क्षमता चांगली दिसून आल्याचेही खासदार राऊत म्हणाले. राहुल गांधी हे भविष्यातील देशाचे नेते आहेत, असे वक्तव्य करीत भाजपने जरी गुजरातमध्ये विजय मिळविला आहे मात्र त्यांचा हा विजय अपमानास्पद विजय आहे, असे ते म्हणाले. गुजरात निवडणुकीत भाजपतर्फे सर्व शक्ती पणाला लावण्यात आली होती तरीही भाजप काठावर पास झाला यामुळे ही एकप्रकारे भाजपची हारच आहे. अहंकार बाळगणाऱ्या पक्षांसाठी गुजरातची निवडणूक ही धोक्याची घंटा आहे, असेही ते शेवटी म्हणाले.