पेट्रोलपंप परिसरात सट्टा पेढीवर छापा

जळगाव ः शहरातील गुजराल पेट्रोलपंप भागतील सट्टा पेढीवर खुलेआम मद्यपान तर सट्टापेढी चालवणारा हातात चाकू घेऊन परिसरात दहशत माजवत असल्याची माहिती मिळाल्यावर जिल्हा पेठ पोलिसांनी धाड टाकून संशयितांना ताब्यात घेतले.

गुजराल पेट्रोलपंप परिसरात एका झाडाखाली सर्रासपणे सट्टापेढी सुरू आहे. येथे खुलेआम मद्यपान करीत असल्याची माहिती जिल्हा पेठ पोलिसांना मिळाली होती. त्यानुसार भास्कर पाटील, रवी तायडे, राजेंद्र मेढे, छगन सोनवणे, अजित पाटील व नाना तायडे यांच्या पथकाने घटनास्थळी धाव घेतली. तेथे नरेंद्र उर्फ शंभू दिलीप भोसले हा सट्टापेढीचालक आढळून आला. छापा मारल्यानंतर सट्टापेढीवर काम करणारे नितीन त्र्यंबक सपकाळे (वय ४०, रा. पिंप्राळा, आंबेडकरनगर), शेख समत शेख कादर (वय ५४, रा. खंडेराव नगर) व दिलीप तीलाराम नाथाणी (वय ५१, रा. दर्शन कॉलनी) तिघे आढळले. पोलिसांच्या छाप्यात दोन हजार रुपयांचा मुद्देमाल मिळून आला असून, दारूच्या बाटल्या, सट्ट्याचे आकडे लिहण्याचे साहित्य आहे. दिलीप पाटील यांच्या फिर्यादीवरून तिघांविरुद्ध गुन्हा दाखल केला आहे.