सोनसाखळी चोरट्यांना आठ तासांतच अटक

म. टा. प्रतिनिधी, जळगाव

शहरातील गणपतीनगरातील रहिवासी रुपाली परेश लढ्ढा या आपल्या पती, सासू, दोन मुलांसह शनिवारी रात्री गणपती पाहायला गेल्या होत्या. या वेळी फुले मार्केट परिसरात असताना दुचाकीवरून आलेल्या चोरट्यांनी रुपाली यांच्या गळ्यातील १२ ग्रॅमची सोनसाखळी लांबविली. याप्रकरणी पोलिसांत गुन्हा दाखल केल्यानंतर पोलिसांनी तातडीने मध्यरात्रीतून दोन्ही चोरट्यांना ताब्यात घेतले आहे. त्यांनी गुन्ह्याची कबुली दिली.

रुपाली परेश लढ्ढा (वय २८) या शनिवारी रात्री टॉवर चौक परिसरात दुचाकीने गणपती आरास पाहण्यासाठी आल्या होत्या. त्या सासूसोबत दुचाकीवर पुढे येऊन फुले मार्केट परिसरात मुख्य रस्त्यावर उभ्या असताना त्यांच्या मागून एका काळ्या रंगाच्या दुचाकीवरून चोरटे आले. पथदिवे बंद असल्यामुळे रस्त्यावर जास्त प्रकाश नसल्याची संधी साधून चोरट्यांनी रुपाली यांच्या गळ्यातील १२ ग्रॅम वजनाची सोनसाखळी तोडून पळ काढला. सोनसाखळी ओढल्यानंतर चोरटे गल्ली-बोळातून मार्ग काढत असताना रुपाली यांनी आरडाओरड केली. या वेळी काही तरुणांनी पाठलाग करण्याचा प्रयत्न केला. यात एका तरुणाने चोरट्यांच्या दुचाकीचा क्रमांक लक्षात ठेवला. या प्रकरणी रुपाली यांनी शहर पोलिस ठाण्यात जाऊन तक्रार केली असता पोलिस कर्मचारी संजय हिवरकर व सुधीर साळवे यांनी तपास सुरू केला. दुचाकीच्या अपूर्ण क्रमांकावरून त्यांनी शनिवारी मध्यरात्री १ वाजता आकाश व बंटी यांना कंजरवाडा परिसरातून ताब्यात घेतले. दोघांनी या गुन्ह्याची कबुली देत चोरलेली सोनसाखळी काढून दिली. पोलिसांनी चोरट्यांना अटक करुन त्यांची दुचाकी (एमएच १९ बीटी ५५५२) देखील जप्त केली आहे. या प्रकरणी अटक केलेल्या दोन्ही संशयितांना रविवारी न्यायालयात हजर करून दोन दिवसांची पोलिस कोठडी सुनावण्यात आली आहे. सरकारपक्षातर्फे अॅड. सुप्रिया क्षीरसागर यांनी काम पाहिले.