रेल्वे स्थानकाचा पर्यायी रस्ता खुला

म. टा. प्रतिनिधी, जळगाव

रेल्वे स्टेशन कडून सेंट्रल मॉलकडे जाणारा रस्ता मंगळवारी (दि. १५) पालकमंत्री चंद्रकांत पाटील यांच्या हस्ते वाहतुकीसाठी खुला करण्यात आला. यावेळी महापौर नितीन लढ्ढा, आमदार सुरेश भोळे, जिल्हाधिकारी किशोर राजे निंबाळकर, स्थायी समिती सभापती वर्षा खडके यांच्यासह मान्यवर उपस्थित होते.

जळगाव रेल्वे स्टेशनजवळ होणारी वाहतूक कोंडी टाळण्यासाठी जिल्हाधिकारी किशोर राजे निंबाळकर यांनी रेल्वे विभागाशी चर्चा करून त्यांनी बांधलेली मॉलच्या बाजूची भिंत काढून टाकण्याच्या सूचना केल्या होत्या. मागील आठवड्यात ही भिंत तोडण्यात आली असून, स्टेशनकडून मॉलकडे जाण्यासाठी रस्ता तयार करण्यात आला आहे. सेंट्रल मॉलच्या बाजूने रेल्वे विभागाची १२ मीटर भिंत तोडण्यात आली. या ठिकाणाहून मॉलकडे जाण्यासाठी रस्ता तयार करण्यात आलेला रस्ता मंगळवारी, पालकमंत्र्यांच्या हस्ते वाहतुकीसाठी खुला करण्यात आला. या रस्त्यामुळे रेल्वे स्टेशनजवळील वाहतूक कोंडी दूर होण्यास मदत होणार आहे.