बालिकेवरील अत्याचाराचा तेली समाजातर्फे निषेध

दोंडाईचा येथे घडली होती घटना

म. टा. प्रतिनिधी, जळगाव

दोंडाईचा येथे दि. ८ फेब्रुवारी रोजी ज्ञानोपासक शिक्षण मंडळ संचालित नूतन माध्यमिक विद्यालयात पहिलीत शिकणा­ऱ्या चिमुकलीवर विद्यालयाच्या आवारात अत्याचार करण्यात आला होता. या घटनेचा सोमवारी, (दि. १९) जळगाव जिल्हा तेली समाज शिक्षण प्रसारक मंडळातर्फे निषेध करण्यात येऊन आरोपीच्या अटकेसाठी पोलिस अधीक्षकांना निवेदन देण्यात आले.

चॉकलेटचे आमिष देऊन एका अज्ञात नराधमाने अत्याचार केल्याची घटना विद्यालयाच्या आवारात घडली. या घटनेनंतर पीडित मुलीच्या नातेवाईकांच्या सांगण्यानुसार शिक्षण मंडळाच्या संचालकांकडून प्रकरण दडपण्याचा प्रयत्न करण्यात आला. सदरचा प्रकार घृणास्पद व माणुसकीला काळिमा फासणारा आहे, असे यावेळी सांगण्यात आले. पोलिस अधीक्षकांनी लक्ष देत आरोपीला लवकरात लवकर अटक करावी. पीडित बालिकेच्या आई-वडीलांना संरक्षण द्यावे, अशी मागणी यावेळी करण्यात आली. या प्रकरणात जर कारवाई झाली नाही. तर तेली समाजातर्फे संपूर्ण महाराष्ट्रात आंदोलन छेडण्यात येईल, असा इशाराही यावेळी देण्यात आलेल्या निवेदनात देण्यात आला आहे.

या घटनेचा निषेधासाठी सोमवारी जळगाव जिल्हा तेली समाज शिक्षण प्रसारक मंडळ, जळगाव जिल्हा तेली समाज महासभा, खान्देश तेली समाज सेवा संस्था जळगाव, संताजी जगनाडे महाराज बहुउद्देशीय महिला मंडळ, जळगाव, संताजी जगनाडे महाराज तेली समाज बहुउद्देशीय युवक मंडळ शेंदूर्णी, अखिल भारतीय छावा संघटना ,महाराष्ट्र विश्वकर्मा सेना, नारीशक्ती संघटना जळगाव, समाज संघटनेचे पदाधिकारी, कार्यकर्ते व समाजबांधवांनी आपला सहभाग नोंदविला.