कुलगुरूंचा विद्यार्थ्यांसोबत बस प्रवास

जळगाव ते विद्यापीठ विद्यार्थी बस सेवेस युवकदिनी सुरुवात

म. टा. प्रतिनिधी, जळगाव

उत्तर महाराष्ट्र विद्यापीठाच्या पासधारक विद्यार्थ्यांसाठी राज्य परिवहन महामंडळाच्या बससेवेला गुरुवारी (दि. १२) प्रारंभ करण्यात आला. कुलगुरू प्रा. पी. पी. पाटील व आगारप्रमुख एस. बी. खडसे यांनी जुन्या बस स्थानकातून बसला हिरवा झेंडा दाखवून प्रारंभ केला. विशेष म्हणजे कुलगुरूंनी स्वत: या बसमध्ये विद्यापीठांपर्यंत प्रवास केला.

विद्यापीठात नियमित बससेवा सुरू करावी, अशी अनेक विद्यार्थ्यांची मागणी होती. कुलगुरू प्रा. पाटील यांनीही पदाची सुत्रे हाती घेतल्यानंतर विद्यार्थ्यांच्या प्रवासाचा प्रश्न तातडीने सोडविला जाईल, असे सांगितले होते. अखेर त्याला राष्ट्रीय युवादिनी मूर्तस्वरूप प्राप्त झाले आहे. यावेळी विद्यार्थ्यांच्या उत्साह ओसंडून वाहत होता.

कुलगुरू प्रा. पाटील यांनी आनंद व्यक्त करून विद्यार्थ्यांनी या बससेवेला प्रतिसाद द्यावा, असे आवाहन केले. महामंडळाने विद्यापीठाच्या मागणीप्रमाणे ही सुविधा द्यावी, अशीही अपेक्षा त्यांनी व्यक्त केली. आगारप्रमुख एस.बी. खडसे यांनीही सहकार्य करण्याचे आश्वासन दिले. यावेळी जिल्हा वाहतूक अधिकारी विजय धायडे, निलीमा बागूल तसेच बसचे चालक सोपान सपकाळे व पी. एस. भगत, वाहक गोपाल पाटील व मनोज सोनवणे यांचा कुलगुरूंच्या हस्ते सत्कार करण्यात आला. सूत्रसंचालन जनसंपर्क अधिकारी सुनील पाटील यांनी केले, प्रा. संदीप केदार यांनी आभार मानले.


अनेक दिवसांची मागणी पूर्ण

अनेक वर्षांपासूनची विद्यार्थ्यांची बससेवेची मागणी होती. दररोज सकाळी ८:३० ते ९:३० या वेळेत विशेष बससेवा सुरू राहणार असून सायंकाळी ४:३० ते ५:३० या वेळेतही परतीच्या प्रवासासाठी बस उपलब्ध राहतील. फक्त उमविच्या पासधारक विद्यार्थ्यांसाठीच ही सेवा राहणार आहे.