अनियंत्रित कारचा थरार

हमीद चौकात अपघात; धडकेत चार जखमी, सहा वाहनांचे नुकसान

म. टा. प्रतिनिधी, जळगाव

शहरात डी-मार्ट ते हमीद चौकादरम्यानच्या रस्त्यावर रविवारी (दि. २०) सकाळी एका विचित्र अपघातात कारने तब्बल सहा वाहनांना धडक दिली. या अपघातात दुचाकीवरील दोन वृद्ध, मोटारसायकलीवरील एक दाम्पत्य जखमी झाले तर दोन रिक्षांचेही नुकसान झाले. दरम्यान, कारचालक शिकावू होता त्याला पोलिसांनी ताब्यात घेतले असून, जखमींवर शासकीय रुग्णालयात उपचार सुरू आहेत.

यामध्ये प्रकाश पाटील (रा. मोहन नगर, जळगाव) व त्यांचा मित्र संतोषकुमार सुमन (वय ३२) हे दोघे कार (एमएच १९ बीजे ८२५७) ने शहरात येत होते. या वेळी कार संतोषकुमार हा चालवित होता. डी-मार्टजवळ आल्यावर अचानक संतोषकुमार यांचे गाडीवरील नियंत्रण सुटल्याने जवळच उभ्या असलेल्या मोपेड (एमएच १९ एजी ५२१४) ला जोरदार धडक दिली. या धडकेत मोपेडचालक दिव्यांग सैय्यद रफीक सैय्यद रसुल (वय ५४, रा. समता नगर) हे जखमी झाले. पुढे ही कार दुचाकीस्वार निशिकांत रामचंद्र कुळकर्णी (वय ५६) यांच्या दुचाकी (एमएच १९ बीएस ८२८९) ला जाऊन धडकली. ते हे त्यांच्या मुलीसह गावात टी.व्ही दुरुस्ती करण्यासाठी येत होते. कारचालक संतोषकुमार यांचे कारवरील नियंत्रण सुटल्याने पुढे शशिकांत कुलकर्णी यांच्या मुलगी पूर्वी या सुनिल सोनवणे रा. संभाजी नगर यांच्या रिक्षा (एमएच १९ व्ही ५३७१) ने येत होत्या. या रिक्षेलाही कारने मागून जोरदार धडक दिली. या अपघतात गाडीचालक कुळकर्णी यांच्या डोक्याला व हाताला दुखापत झाली. पुढे ही कार सुसाट वेगात असल्याने अनियंत्रित झाली होती. पुढे जावून कारने मोटारसायकलस्वार दाम्पत्य अनिल मनोहर वाणी व राखी अनिल वाणी (रा. उमेश पार्क, मोहाडी रोड) यांच्या मोटारसायकली (एमएच १९ बीएच ४८११) ला धडक दिली. त्यामुळे अनिल वाणी यांच्या हाताला व तर राखी यांच्या चेहऱ्याला व डोक्याला दुखापत झाली आहे. दरम्यान, या विचित्र अपघातानंतर कारने रस्त्याच्या कडेला उभ्या असलेल्या रिक्षा (एमएच १९ व्ही ६३२) तसेच दुचाकी (एमएच १९ डीएफ ९४९४) ला धडक दिल्याने दोघांचेही नुकसान झाले आहे.

कारचालक ताब्यात
या विचित्र अपघाताची माहिती मिळताच शहर वाहतूक शाखेचे पोलिस कर्मचारी अशोक महाजन, राहुल पाटील, प्रशांत पाटील यांनी घटनास्थळी धाव घेवून कारचालकास ताब्यात घेतले. यानंतर कारचालकाला एमआयडीसी पोलिसांच्या ताब्यात देण्यात आले. घटनास्थळी एमआयडीसी पोलिस स्टेशनचे अधिकारी व कर्मचाऱ्यांनी धाव घेत पुढील कार्यवाही केली. दरम्यान, या अपघातात सहा वाहनांचे नुकसान झाल्याने संतप्त जमावाने कारचालकाला कारबाहेर काढून मारहाण करण्याचा प्रयत्न केला. मात्र, या वेळी मिलींद सोनवणे यांनी धाव घेवून कारचालकाला वाहतूक पोलिसांच्या ताब्यात दिले.