जळगावकरांना पावसाची प्रतीक्षा

म. टा. प्रतिनिधी, जळगाव

नेहमीच उकाड्याने हैराण होणाऱ्या जळगावकरांना यंदा जबरदस्त उकाड्याला सामोरे जावे लागत आहे. या महिन्यात तापमान ४५ अंशांवर गेल्यामुळे नागरिक हैराण झाले होते. गेल्या आठ दिवसांत आर्द्रता वाढल्याने असह्य उकाडा होत आहे. मे महिन्याचा शेवटचा आठवडा असूनदेखील तापमानाचा पारा ४३ अंशांवर आहे. वैतागलेल्या जळगावकरांना आता पावसाची प्रतीक्षा लागून राहिली आहे.

जळगाव तालुक्यासह जिल्ह्यातील काही भागात गेल्या चार दिवसांत वळवाच्या पावसाने वादळी वाऱ्यासह हजेरी दिली आहे. या पावसाच्या सरींमुळे ४५ अंशावर गेलेले तापमान ४३ अंशावर आले आहे. मात्र, आर्द्रता वाढल्याने उकाडा जळगावकरांना नकोसे करीत आहे. तापमानाचा जोर कायम असला तरी गेल्या काही दिवसांपासून दिवसभरात वातावरणात होणारे बदल जळगावकरांना मान्सूनची आशा दाखवत आहेत. अधूनमधून ढगाळ वातावरण मान्सूनची चाहूल देत असून, शनिवारीदेखील कमाल तापमानाचा पारा ४३ अंश सेल्सिअसवर होता.