साक्ष देण्यास मज्जाव; तरुणास बेदम मारहाण

म. टा. प्रतिनिधी, जळगाव
तालुक्यातील म्हसावद येथील तरुणास कोर्टात सुरू असलेल्या खटल्यात साक्ष देण्यास मज्जाव करण्यासाठी १२ ते १३ जणांनी लाठ्या-काठ्यांनी बेदम मारहाण केल्याची घटना सोमवारी (दि. १२) रात्री उशीरा घडली. या प्रकरणी एमआयडीसी पोलिस ठाण्यात गुन्हा दाखल करण्यात आला आहे.

म्हसावद गावातच राहणाऱ्या सोनवणे कुटुंबीयांच्या विरुद्ध न्यायालयात खटला सुरू आहे. या खटल्यात दशरथ गंगाराम कोळी (वय ३५, रा. खडसेनगर, म्हसावद) हा साक्षीदार आहे. त्याने त्यांच्याविरोधात साक्ष देऊ नये असा आग्रह सोनवणे कुटुंबीयांचा आहे. या कारणामुळे सोमवारी रात्री ११ वाजता त्यांच्यात वाद झाला. या वेळी बापू चंद्रभान सोनवणे, संजू चंद्रभान सोनवणे, अनिल माचले, अरुण चंद्रभान सोनवणे, रवी माचले, कैलास पिंटू सोनवणे, योगेश पिंटू सोनवणे, जीतू जंगलू भील, शोभा बापू भिल, चंद्रभान सोनवणे व भिकुबाई चंद्रभान सोनवणे यांनी दशरथला मारहाण केली. यात दशरथ गंभीर जखमी झाला असून त्याच्यावर रुग्णालयात उपचार सुरू आहेत. दशरथ याने दिलेल्या फिर्यादीवरून तेरा जणांविरुद्ध एमआयडीसी पोलिस ठाण्यात मारहाण व दंगलीचा गुन्हा दाखल करण्यात आला आहे. बळीराम सपकाळे तपास करीत आहेत.