शहराच्या तापमानाचा पारा ४३ अंश सेल्सिअसवर

म. टा. प्रतिनिधी, जळगाव

जळगाव धुळे, नंदुराबारसह अवघ्या खान्देशातच उष्णतेची लाट आली आहे. त्यामुळे खान्देशवासीयांच्या अंगाची लाही लाही होत आहे. 'स्कायमेट' या हवामानाच्या संकेतस्थळावर गुरुवारी जळगावचे दुपारी ३ वाजेचे तापमान ४६ अंश इतके नोंदविण्यात आले. तर दुसरीकडे भारतीय हवामान संकेतस्थळानुसार शहराचे कमाल तापमान हे ४३ अंश सेल्सिअस एवढे नोंदविण्यात आले.
शहरासह जिल्ह्यातील तालुक्यातही तापमानाचा पारा चांगलाच तापल्याने या परिसरातील नागरिकांना असह्य उकाड्याचा सामना करावा लागत आहे. गुरुवारी (दि. २५ ) तापमान ४६ अंशावर असल्याने लहानग्यांसह वृद्ध हैराण झाले आहेत. जळगाव पाठोपाठ स्कायमेटच्या नोंदीनुसार धुळे येथे गुरुवारचे तापमान ४४ ते ४५ अंश सेल्सिअस इतके नोंदविण्यात आले आहे. वाढत्या तापमानामुळे शहरातील शीतपेयाची दुकाने, टोप्या, हातरूमाल यांच्या दुकानावर नागरिकांनी गर्दी केली आहे. एप्रिल महिन्याची अखेर असल्याने शाळांना सुट्या लागल्या असल्या तरी महाविद्यालयीन परिक्षा सुरु आहेत. त्यामुळे महाविद्यालयीन विद्यार्थ्यांची अभ्यासक्रमाची व बाहेर उनाच्या झळा सोसण्याची अश्या दुहेरी परिक्षांना समोरे जावे लागत आहेत. या उन्हाच्या तीव्रतेने शहरातील शिवतीर्थ मैदान, मणियार ग्राऊंड, सागर पार्क यासारखी मोठी मैदाने ओस पडलेली आहेत. गेल्या चार दिवसांपासून पारा कायम असून, उपनगरांमधील बहुतांश रस्तेदेखील दुपारी १२ ते ४ निर्मनुष्य दिसत आहेत.