परिचारिकांचा ‘ऑन ड्युटी’ ठेका!

सिव्हिलच्या नवजात शिशू विभागातील प्रकार

म. टा. प्रतिनिधी, जळगाव

शासकीय वैद्यकीय रुग्णालय व महाविद्यालयातील नवजात शिशू उपचार कक्षात ऑन ड्युटी असताना काही परिचारिकांनी ध्वनिक्षेपक लावून नाचगाण्याचा कार्यक्रम केल्याचा धक्कादायक व्हिडीओ सोमवारी (दि. २१) सोशल मीडियावर व्हायरल झाला. या प्रकाराची तक्रार माहिती अधिकार कार्यकर्ते दीपक गुप्ता यांनी केली आहे.

शासकीय वैद्यकीय महाविद्यालय व रुग्णालयातील नवजात शिशू उपचार कक्षात काही परिचारिकांनी मकरसंक्रांतीनिमित्त हळदी-कुंकू कार्यक्रम आयोजित केला होता. या वेळी त्यांनी हिंदी, मराठी गाण्यांवर नृत्य करीत रुग्णालयातच या परिचारिकांनी ठेका धरला. ऑन ड्युटी असताना परिचारिकांनी हा कार्यक्रम घेतला. एक-दोन परिचारिका अंगात अ‍ॅप्रॉन परिधान केलेले असताना नृत्य करीत होत्या. या कार्यक्रमासाठी रुग्णालय प्रशासनाची कोणतीही पूर्वपरवानगी घेण्यात आलेली नव्हती. सोमवारी दुपारी सोशल मीडियावर या कार्यक्रमाचा व्हिडिओ व्हायरल झाला. ज्या नवजात शिशू उपचार कक्षात नवजात शिशूंवर उपचार केले जातात, त्याच ठिकाणी मोठ्याने गाणे लावून या परिचारिका नाचत होत्या. त्यांनी कक्षात उपचारासाठी नवजात शिशू असतात याचे साधे भानही न ठेवल्याने आश्चर्य व्यक्त होत आहे.

आरोग्य सहसंचालकांकडे तक्रार
व्हिडीओ व्हायरल झाल्यानंतर याबाबत दीपक गुप्ता यांनी व्हॉट्सअॅपवरच या व्हिडीओसह आरोग्य सहसंचालक अर्चना पाटील यांच्याकडे तक्रार केली. या वेळी त्यांनी या प्रकाराची चौकशी करून संबंधित परिचारकांवर कारवाई करण्याची मागणी केली आहे. सोशल मीडियावर या कार्यक्रमाचा व्हिडीओ व्हायरल झाल्यानंतर शासकीय वैद्यकीय महाविद्यालयाचे अधिष्ठाता डॉ. भास्कर खैरे यांनी, या प्रकाराची चौकशी करण्यात येण्योच सांगितले. मकर संक्रांतीनिमित्त दरवर्षी रुग्णालयात महिला परिचारिका हळदी-कुंकू कार्यक्रम आयोजित करतात. याही वर्षी हा कार्यक्रम पार पडला. त्यात चुकीचा प्रकार झाला नाही, अशी सारवासारव परिचारिकांनी केली.