पाचशेच्या नोटांची प्रतीक्षा कायम

आरबीआयकडून अद्यापह‌ी बँकांना नोटा नाहीच

म. टा. वृत्तसेवा, जळगाव

गेल्या वीस दिवसांपासून चलनातून ५०० आणि एक हजार रुपयांच्या नोटा बाद केल्यात. मात्र, त्यांच्या बदल्यात केवळ २ हजार रुपयाची नोटच ग्राहकांच्या हातात पडत आहेत. बँकांमधून ५०० रुपयांच्या नव्या नोटा येणार होत्या. त्या मात्र भारतीय रिझर्व्ह बँकेकडून अद्याप जळगाव जिल्ह्यातील कोणत्याही बँकामध्ये उपलब्ध करून देण्यात आले नसल्याचे स्टेट बँकेतील अधिकाऱ्यांकडून समजते.

सरकारने ५०० व एक हजार रुपयांच्या नोटा चलनातून बाद केल्याचा निर्णय काळा पैसा काढण्यासाठी केला. त्यानंतर नोटा बदलवण्याकरिता ५० दिवसांची मुदतही देण्यात आली, मात्र या दिवसात केवळ बँकेतून २ हजार रुपयांची नोटच ग्राहकांच्या हाती पडलेली आहे. परिणामी, ५०० रुपयाची नोट कधी हाती येईल, असे ग्राहकांना झाले आहे. कारण दोन हजार रुपयांच्या सुट्ट्यांसाठी खूप त्रास सहन करावा लागतो. सोमवारी, ५०० रुपयाची नोट उपलब्ध होतील, असे संकेत होते. मात्र ग्राहकांना २ हजार आणि काही १०० रुपयांच्या नोटांवर समाधान मानावे लागल्याचे दिसून आले.

एटीएमला रांगाच

नोटा बादच्या निर्णयाला २१ दिवस उलटले तरी एटीएममधून २ किंवा अडीच हजार इतकीच रक्कम एकाचवेळी आणि एकाच दिवशी प्राप्त होत आहे. पैशांची टंचाई झाल्याने नव्या चलनाची आवश्यकता नागरिकांना भासत आहे. म्हणूनच शहरातील एटीएमवरची रांग कमी होत नसल्याचे चित्र आहेत. एटीएममधूनदेखील २ हजार रुपयाची नोट येत असल्याने ग्राहकांकडून शक्कल लढविण्यात येत आहेत. थेट २ हजार रुपयाची अमाऊंट न टाकता ऑड फिगर टाकून पैसे काढण्यात येत आहे.हवी तेवढी रक्कम मंगळवारी काढता येणार असल्याचे जाहिर झाले होते. मात्र मंगळवारीही एटीएममधून २ हजार रुपयेच निघाले. मात्र स्टेट बँकेच्या एटीएममधून २ हजार रुपयेही १०० रुपयांच्या स्वरुपात मिळाल्याने रांगेत उभे राहिलेल्यांमध्ये आनंदाचे वातावरण होते.