१५ वर्षे काम करत 'त्याने' विश्वास संपादन केला, अन् दागिणे, रोकड घेवून पसार झाला

जळगाव : सोने, चांदीचे दागिने तयार करणाऱ्या कारागिराने पंधरा वर्षांत विश्वास संपादन केला. पण त्यानेच विश्वासघात केला. सोने, चांदीच्या दोन व्यापाऱ्यांची ५ लाख ७४ हजार रुपयांत फसवणूक केल्याची घटना समोर आली आहे. याप्रकरणी शनिपेठ पोलिसात फसवणूक करणाऱ्या कारागिराविरोधात मंगळवारी गुन्हा दाखल झाला आहे.

जळगाव शहरातील मारोती पेठ येथील रहिवासी सुशांत तारकनाथ भुतका (वय ४२) यांचा सोने, चांदीचे दागिणे बनविण्याचा कारखाना आहे. या कारखान्यात बापन मंटू कारक (वय २८ रा. पश्चिम बंगाल) हा कारागिर गेल्या १५ वर्षांपासून सोने, चांदीचे दागिणे बनविण्याचे काम करत होता. यादरम्यान त्याने विश्वास संपादन करुन घरबांधकामासाठी पैशांची आवश्यकता असल्याचे सांगत कारखान्याचे मालक सुशांत भुतका यांच्याकडून २ लाख ६० हजार रुपये घेतले. यादरम्यान त्याने दिपक संघवी यांच्याकडूनही ३ लाख १४ हजार रुपयांचे दागिणे बनिवण्यासाठी घेतले होते.

कारगिर बापन कारक हा एक दिवस दिसून आला नाही. सर्वत्र शोध घेतला मात्र तो सापडलाच नाही. तसेच त्याच्याशी संपर्क करण्याचा प्रयत्नही केला. मात्र संपर्कही झाला नाही. सुशांत भुतका यांच्याकडून घेतलेले २ लाख ६० हजार रुपये व दिपक संघवी यांचे ३ लाख १४ हजार रुपयांचे दागिणे परत न पसार झाला. बापन कारक याने दोन व्यापाऱ्यांची एकूण ५ लाख ७४ हजार रुपयांची फसवणूक केली. पैसे तसेच दागिणे परत मिळत नसल्याने तब्ब्ल दोन महिन्यानंतर सुशांत भुतका यांनी बापन कारक याच्याविरोधात शनिपेठ पोलिसात तक्रार दिली. या तक्रारीवरुन मंगळवारी गुन्हा दाखल करण्यात आला आहे. पुढील तपास पोलीस उपनिरिक्षक प्रदीप बोरुडे हे करत आहेत.