जळगावः कांग नदीत बुडून महिलेचा मृत्यू

जळगावः जिल्ह्यातील जामेनर येथे कांग नदी काठावर धुणी धुण्यासाठी गेलेली महिला अचानक आलेल्या पुरात वाहून गेल्याची दुर्दैवी घटना शनिवारी सकाळी सहा वाजेच्या सुमारास घडली. वाघूरच्या बॅक वॉटरजवळ महिलेचा मृतदेह सकाळी नऊ वाजेच्या सुमारास आढळून आला. जायेदाबी शब्बीर शाह (वय ४४) असे मृत महिलेचे नाव आहे.

जामनेर शहरातील बिस्मिल्ला नगरात राहणाऱ्या जायेदाबी या शेजारील महिलांसोबत कपडे धुण्यासाठी कांग नदीवर गेल्या होत्या. नदीला अचानक आलेल्या पुरात त्या वाहून गेल्या. त्यांच्या पश्चात पती, ३ मुले, २ मुली, असा परिवार आहे. कांग नदीने या वर्षात घेतलेला हा पाचवा बळी आहे.

बुडून तरुणचा मृत्यू

जामनेर तालुक्यातील घटनेत पहूर येथे वाघूर नदीच्या पाण्यात बुडून शेख शाहरुख शेख आयुब (वय २७) या तरुणाचा दुदैर्वी मृत्यू झाला. तो शौचविधीस गेला असता, नदीत पाय घसरून पडला. त्यात त्याचा मृत्यू झाला. शनिवारी सकाळी ही घटना घडली.