लांडोरखोरी उद्यान ठरणार पर्वणी

म. टा. प्रतिनिधी, जळगाव

वन विभागाने मोहाडी रोडवर लांडोरखोरी उद्यान निर्माण केले असून नागरिकांसाठी व निसर्गाचा सान्निध्य हवा असणार्‍यांसाठी पर्वणीच आहे, अशी माहिती उप वनसंरक्षक आदर्श रेड्डी, सहाय्यक वनसंरक्षक एस. आर. पाटील, वन परिक्षेत्र अधिकारी एन. जी. पाटील यांनी बुधवारी (दि. २३) दिली.

वनविभागाच्या ७० हेक्टर जागे पैकी सुमारे १० हेक्टर जागेवर हे उद्यान बनविण्यात आले. सुमारे ३ हजार वृक्ष आहेत. सर्वधर्मीय वन अशी नवीन संकल्पना येथे राबविण्यात आली आहे. त्यात रामायण वन, रामायणात उल्लेख असलेल्या अनेक वनस्पती या उद्यानात दिसतील. सोबतच अशोक उद्यान, जैन उद्यान, इस्लाम उद्यान, ख्रिस्ती उद्यान, त्रिफळा उद्यान, महाभारत उद्यान, बौद्ध उद्यान अशा नावांची उद्याने यात असतील. गणेश आराधनेत लागणार्‍या विविध वनस्पतींचे गणेश वन, पंचवटी वन, गुलाब उद्यान, नंदन वन, लाख वन, १२ राशी व २७ नक्षत्रासारखी विविध राशींसाठी लाभदायक असलेले वृक्ष माहितीसह नक्षत्र उद्यान, अंजिर उद्यान, ताड उद्यान, वेळू (बांबू )उद्यान याठिकाणी निर्माण करण्यात आले आहे, अशीही माहिती यावेळी देण्यात आली. स्वास्थ्य कल्पनेस प्रोत्साहन देण्यासाठी ३ किलोमीटर लांबीचा जॉगिंग ट्रॅक तयार केला आहे. ५ किलोमीटर व ८ किलोमीटर लांबीचा जॉगिंग ट्रॅक पूर्ण होण्याच्या मार्गावर आहे. निसर्गाच्या सानिध्यात खुली व्यायामशाळा असून, व्यायामाचे साहित्य नागपूर येथून आणण्यात आले आहे. हर्बल उद्यानात मनुष्याच्या प्रकृतीस आवश्यक १०८ वनस्पती असणार असल्याचेही त्यांनी सांगितले.