परवीन सुलताना यांना जीवनगौरव

शास्त्रीय संगीतासाठी सन्मान; शुक्रवारी वितरण

म. टा. प्रतिनिधी, जळगाव

महाराष्ट्र राज्य सरकारच्या सांस्कृतिक कार्य संचालनालयातर्फे भारतरत्न पं. भीमसेन जोशी यांच्या नावाने शास्त्रीय संगीतासाठी दिला जाणारा यंदाचा जीवनगौरव पुरस्कार जेष्ठ गायिका बेगम परवीन सुलताना यांना जाहीर झाला आहे. हा पुरस्कार जळगावला शुक्रवारी (दि.१७) शालेय शिक्षण, सांस्कृतिक कार्यमंत्री विनोद तावडे, महसूलमंत्री चंद्रकांत पाटील,जलसंपदा मंत्री गिरीश महाजन यांचे उपस्थितीत प्रदान करण्यात येणार आहे.

राज्य सरकारच्या सांस्कृतिक कार्य संचालनालयातर्फे २०१२ पासून भारतरत्न पं. भीमसेन जोशी शास्त्रीय संगीत जीवन गौरव पुरस्कार देण्यात येतो. आतापर्यंत गानसरस्वती किशोरी अमोणकर, संगीत मार्तंड पंडित जसराज, डॉ. प्रभा अत्रे ,पंडित रामनारायण आदी मान्यवर या पुरस्काराचे मानकरी ठरले आहेत. जीवनगौरव पुरस्काराचे स्वरूप पाच लाख रुपये रोख, मानपत्र व सन्मानचिन्ह असे आहे.

संगीत महोत्सवाचे आयोजन

शुक्रवारी (दि. १७) सायंकाळी सहा वाजता बालगंधर्व नाट्यगृहात हा पुरस्कार प्रदान करण्यात येणार आहे. यानिमित्त दि. १७ ते १९ मार्च या कालावधीत शास्त्रीय संगीत महोत्सवाचे आयोजन करण्यात आले आहे. दि. १७ मार्चला गायिका प्रीती पंढरपूरकर, सानिया पाटणकर, आणि सतारवादक समीप कुलकर्णी हे आपली कला सादर करतील. दि.१८ मार्चला बेगम परवीन सुलताना यांच्या सुरेल गायनाचा लाभ रसिकांना होणार आहे. या शिवाय देबवर्णा कर्माकर व धनंजय हेगडे यांचे शास्त्रीय गायन व अभिषेक लाहिरी यांचे सरोद वादन रसिकांना ऐकता येईल. अखेरच्या दिवशी रविवारी (दि. १९) उन्मेषा आठवले, रूचिरा पंडा यांचे गायन आणि विवेक सोनार यांच्या बासरी वादनाने या महोत्सवाची सांगता होईल.