वाळूचा अवैध उपसा सुरूच

म. टा. वृत्तसेवा, जळगाव

जिल्ह्यात अवैध वाळू उपसा आणि वाहतुकीने उच्छाद मांडला असताना जिल्हा प्रशासनाने जाहीर केलेल्या २१ वाळूसाठ्यांच्या लिलावाला वाळू ठेकेदारांचा थंड प्रतिसाद लाभला आहे. केवळ तीन साठ्यांना हा प्रतिसाद दिला गेला. यामुळे प्रशासनाला धक्क्का बसला आहे.

जिल्ह्यात १७१ वाळूसाठे असून, भूजल सर्वेक्षणने ५० वाळूसाठे हे लिलावासाठी योग्य, तर ५१ साठे हे लिलावासाठी अयोग्य असल्याचा अहवाल दिला होता. या ५० योग्य वाळूसाठ्यांपैकी २१ वाळूसाठयांचा ई-लिलाव जिल्हा प्रशासनाने १० ऑक्टोबरला जाहीर केला होता. त्यानुसार ३ नोव्हेंबरला लिलाव आणि ४ नोव्हेंबरला या लिलावाच्या निविदा उघडल्या जाणार होत्या. दरम्यान, यापूर्वी विधान परिषद निवडणुकीची आचारसंहिता जिल्ह्यात लागू झाली होती. त्यामुळे वाळू लिलावाच्या निविदा उघडता येत नव्हत्या. जिल्हा प्रशासनाला दरवर्षी वाळू लिलावातून मोठ्या प्रमाणावर महसूल मिळत असतो.