सॅल्यूट! जखमी प्रवाशासाठी ट्रेन उलटी चालवली

जळगाव: जखमींच्या मदतीसाठी कोणीही समोर येताना आपल्याला आढळत नाही. वेळेवर उपचार न मिळाल्यामुळे जखमी व्यक्तीचे प्राण संकटात येते. मात्र, रेल्वेच्या लोकोपायलट आणि गार्डने जखमी प्रवाशाचे प्राण वाचवण्यासाठी चक्क उलटी रेल्वे चालवली. देवळाली ते भुसावळ दरम्यान ही घटना घडली.

सकाळी ९.३० वाजण्याच्या सुमारास, देवळाली ते भुसावळ या शटल ट्रेनमधून प्रवास करताना एक तरुण प्रवासी परधाडे ते माहेजी रेल्वे स्थानकादरम्यान तोल गेल्याने पडला. या घटनेनंतर सहप्रवाशांनी साखळी ओढून रेल्वे रोखली. तोपर्यंत गाडीजवळपास एक किलोमीटर पुढे आली होती. या घटनेची माहिती होताच गार्ड व लोकोपायलटमध्ये चर्चा झाली. त्यानंतर त्यांनी या जखमी तरुणाचे प्राण वाचवण्यासाठी जवळपास एक किलोमीटर अंतरापर्यंत ट्रेन उलटी चालवण्याचा निर्णय घेतला.


धक्कादायक: महिलेला जाळून फासावर लटकावले
'महिला सुरक्षितेसाठी कठोर निर्णय घेणे आवश्यक'

घटनास्थळी तरुण जखमी अवस्थेत आढळून आला. त्यावेळी अपमार्गावरून जाणाऱ्या मालगाडीला थांबवण्यात आले. या मालगाडीमधून जखमी तरुणाला जळगाव येथे नेण्यात आले. आधीच निरोप आल्यामुळे जळगाव स्थानकात रुग्णवाहिका उभी होती. तातडीने जखमी तरुणावर उपचार झाल्याने त्याचे प्राण वाचले आहे. रेल्वेच्या गार्ड आणि मोटरमनने दाखवलेल्या संवेदनशीलतेची सध्या जोरदार चर्चा सुरू आहे.