रेल्वे स्टेशन परिसरात पादचाऱ्यास लुटले

म. टा. प्रतिनिधी, जळगाव

रेल्वे स्टेशन परिसरातील हॉटेलच्या आवारात बसलेल्या प्रौढास दुचाकीवरून आलेल्या दोघांनी बेदम मारहाण करून प्रौढाजवळील सात हजार रुपये हिसकावून नेल्याची घटना शुक्रवारी (दि. १८) रात्री १० वाजेच्या सुमारास घडली. शहर पोलिसांच्या पथकाने अवघ्या काही तासातच दोन्ही चोरट्यांना जेरबंद केले आहे. निवृत्ती नगरातील रहिवासी सुभाष सुकदेव पाटील (४८) हे शुक्रवारी रात्री रेल्वे स्टेशन परिसरातील आकाश हॉटेलच्या ओट्यावर बसले होते. रात्री १० वाजेच्या सुमारास काळ्या रंगाच्या पल्सर (एमएच. १९. एसी ६३७८) वरून दोन अज्ञात व्यक्ती त्यांच्याजवळ येत त्यांनी सुभाष पाटील यांना मारहाण करण्यास सुरुवात केली. यानंतर त्यांच्या खिशात असलेले ७ हजार रुपये जबरीने हिसकावून तेथून पोबारा केला. पाटील यांनी चोरट्यांच्या गाडीचा नंबर पाहिला आणि लागलीच शहर पोलिस स्टेशन गाठत घडलेला प्रकार पोलिसांना सांगितला. त्यानंतर पाटील यांच्या फिर्यादीवरून गुन्हा दाखल करण्यात आला. सहाय्यक फौजदार वासुदेव सोनवणे यांना संशयितांची माहिती मिळाली. वासुदेव सोनवणे यांनी लागलीच डिबी कर्मचारी विजयसिंग पाटील व प्रितमसिंग यांना सोबत घेत शिवाजीनगर पूल गाठत त्याठिकाणी दोन्ही चोरटे अंधारात उभे दिसताच त्यांना ताब्यात घेतले. त्यांनी संदीप मधुकर निकम व किरण अनिल बाविस्कर असे नाव सांगितले. दोघांना पोलिसांनी ताब्यात घेत रात्री अडीच वाजेच्या सुमारास अटक केली. रेल्वे स्टेशन परिसरात पादचाऱ्यास लुटले