पाऊसधारांसह बाप्पाचे जल्लोषात आगमन

रात्री उशीरापर्यंत मिरवणुकांची धूम; ढोलताशांनी दणाणले जळगाव

म. टा. प्रतिनिधी, जळगाव

ढोल, ताशांचा गजर...टाळ-मृदुंगाची साथ...तालबद्ध लेझीम पथके...गुलाल व फुलांच्या पाकळ्यांची उधळण अन् मुखी श्रींचे नाम... अशा देहभान हरपून टाकणाऱ्या वातावरणात बाप्पाचे पाऊसधारांसह शुक्रवारी, आगमन झाले. सकाळपासूनच बाजारपेठेत उत्साही वातावरण होते. दुपारी पावसाच्या सरींमध्येही मिरवणुकीत गणेशभक्त देहभान विसरून नृत्य करीत होते.

साईबाबा, महादेवाच्या रूपातील, उभी, बसलेली, अर्धनारी नटेश्वर, रथावर, उंदरावर, वाघावर, राक्षसाला मारताना, तसेच कार्टून रुपातली अशा वेगवेगळ्या रूपांतील गणरायाचे यंदा आगमन झाले आहे. दुपारी पावणेतीन वाजता बाप्पाच्या स्वागताला दमदार पावसानंही हजेरी दिली. तासभर चाललेल्या पावसामुळे गणेशभक्तांचा उत्साह द्विगुणित झाला होता.

शुक्रवारी, सकाळी शहरातील मूर्ती विक्रेत्यांकडे नागरिकांनी गर्दी केली होती. टॉवर चौक, रिंगरोड परिसरात मूर्तीचे स्टॉल लागले होते. शाडू मातीच्या मूर्तींची आवक कमी असल्याने त्यांचे भाव गगनाला भिडले होते. यंदा डॉल्बीच्या आवाजावर अंकुश असल्याने पारंपरिक वाद्ये निनादत होती. गणेशोत्सव साजरा करण्यात विद्यार्थिनीही सहभागी झाल्याचे चित्र टॉवर चौक परिसरात दिसत होते. सायंकाळी ठिकठिकाणी 'गणपती बाप्पा मोरया'च्या गजरात आरतीचे मंगलमय सूर कानी पडत होते. सार्वजनिक गणेश मंडळांमध्ये रात्री उशीरापर्यंत गणरायाचे आगमन चालूच होते. शहरातील सार्वजनिक गणेशोत्सव मंडळांचे देखावे पूर्ण करण्याचे काम जवळपास पूर्ण झाले असून, लवकरच हे देखावे गणेश भक्तांना पाहण्यासाठी खुले केले जातील, असे गणेश मंडळांनी सांगितले आहे. यंदा पोलिसांनी कायदा व सुव्यवस्था अबाधित राहण्यासाठी विशेष नियोजन केले आहे.