नामांतरावर महाविकास आघाडीत तोडगा निघेल; 'या' मंत्र्याला विश्वास

जळगाव: औरंगाबाद शहराचे नामकरण 'संभाजीनगर' झाले पाहिजे, ही शिवसेनाप्रमुख स्वर्गीय बाळासाहेब ठाकरे यांची इच्छा होती. त्यामुळे शिवसेनेची याबाबतची भूमिका स्पष्टच आहे. याप्रश्नी महाविकास आघाडीतील तिन्ही पक्ष एकत्र बसून तोडगा काढतील, असा विश्वास शिवसेना नेते पाणीपुरवठा व स्वच्छता मंत्री गुलाबराव पाटील यांनी आज व्यक्त केला.

जळगाव जिल्हा शासकीय महाविद्यालय व रुग्णालयात आज सकाळी कोरोना लसीकरणाची 'ड्राय रन' घेण्यात आली. याप्रसंगी उपस्थित असलेले पालकमंत्री गुलाबराव पाटील यांनी नामांतरप्रश्नी आपली भूमिका पत्रकारांजवळ मांडली.

वाचा: 'संभाजीनगर' हा उल्लेख CMO साठी नवा नाही! हा घ्या पुरावा

यावेळी गुलाबराव पाटील यांनी सांगितले की, औरंगाबादचे नामकरण संभाजीनगर व्हावे ही पूर्वीपासून सेना प्रमुख बाळासाहेब ठाकरे यांची इच्छा होती. संभाजीनगर नाव देणे चुकीचे नाही. या प्रश्नी तोडगा काढण्यासाठी आम्ही तिन्ही पक्ष एकत्र बसणार असल्याचे उपमुख्यमंत्री अजित पवारांनी देखील सांगितले आहे, असे ते म्हणाले.

फडणवीसांनी शिकवण्याची गरज नाही!

'राज्य पातळीवर काम करताना शिवसेना मराठी माणसाच्या न्याय हक्कासाठी भूमिका घेते. हिंदुत्व कुणी सोडले आहे किंवा बदलले आहे, हे कोणाच्या सांगण्यावरून ठरत नाही. शिवसेनेचा जन्म हा हिंदुत्वासाठी झाला आहे. त्यामुळं फडणवीसांनी आम्हाला हिंदुत्व शिकवू नये, अशा शब्दांत पाटील यांनी विरोधी पक्षनेते देवेंद्र फडणवीस यांच्या वक्तव्याचा समाचार घेतला. शिवसेनेच्या स्थापनेनंतर मुंबईतील विलेपार्ले मतदारसंघातून जे आमदार निवडून आले, त्यांची निवडणूक फक्त हिंदुत्वाच्या मुद्द्यावर रद्द झाली होती, याची आठवणही गुलाबराव पाटील यांनी फडणवीसांना करुन दिली.

वाचा: औरंगाबादचं संभाजीनगर! राऊतांनी सांगितलं काँग्रेसच्या 'मनातलं'