‘महाआरोग्य’ २ ऑक्टोबरला

म. टा. प्रतिनिधी, जळगाव

गरजू रुग्णांना उपचारासाठी महाआरोग्य शिबिरात घेऊन येणे ही मोठी सेवा आहे. यासाठी जिल्ह्यातील सर्व प्रशासकीय यंत्रणेने स्वयंस्फूर्तीने काम करून महाआरोग्य शिबिर यशस्वी करावे, असे आवाहन जिल्हाधिकारी किशोर राजे निंबाळकर यांनी केले. फैजपूर येथे २ ऑक्टोबरला ग्रामीण महाआरोग्य शिबिराचे आयोजन करण्यात आले आहे. त्या पार्श्वभूमीवर जिल्हाधिकारी यांनी नुकताच तयारीचा आढावा घेतला.

पंडित दीनदयाल उपाध्याय जन्मशताब्दी वर्षानिमित्त वैद्यकीय शिक्षणमंत्री गिरीश महाजन यांच्या संकल्पनेतून येत्या २ ऑक्टोबर रोजी मधुकर साखर कारखाना मैदान, फैजपूर, ता. यावल येथे ग्रामीण भागातील राज्यातील पहिल्या महाआरोग्य शिबिराचे आयोजन करण्यात आले आहे. या शिबिराची पूर्वतयारी आढावा बैठक जिल्हाधिकारी निंबाळकर यांच्या अध्यक्षतेखाली बुधवारी जिल्हाधिकारी कार्यालयातील सभागृहात झाली. बैठकीस जिल्हा परिषदेचे मुख्य कार्यकारी अधिकारी कौस्तुभ दिवेगावकर, पोलिस अधीक्षक दत्तात्रय कराळे, जिल्हा शल्य चिकित्सक डॉ. एन. एस. चव्हाण, निवासी उपजिल्हाधिकारी राहुल मुंडके यांच्यासह अधिकारी उपस्थित होते.