क्रांतिसूर्य महात्मा फुले यांना अभिवादन

म. टा. प्रतिनिधी, जळगाव

क्रांतिसूर्य महात्मा जोतिबा फुले यांच्या जयंतीनिमित्त बुधवारी (दि. ११) शहरातील शैक्षणिक, सामाजिक, संघटनांकडून विविध उपक्रम राबवून त्यांना अभिवादन करण्यात आले. जानकी नगरातून जयंतीनिमित्त मिरवणूकदेखील काढण्यात आली.

जयक्रांती ज्योती बहुउद्देशीय संस्था जानकीनगर व खान्देश माळी महासंघातर्फे क्रांतिज्योती महात्मा जोतिबा फुले यांच्या जयंती निमित्ताने मिरवणूक काढण्यात आली. जुने बसस्थानक मार्गे महात्मा जोतिबा फुले यांच्या पुतळ्याजवळ मिरवणुकीची सांगता झाली. मिरवणुकीत मोठ्या प्रमाणात समाजबांधव उपस्थित होते. या वेळी महात्मा फुले व सावित्रीबार्इ फुले यांच्या प्रतीमा वाहनावर ठेवण्यात आल्या होत्या.

भाजपकडून माल्यार्पण
भारतीय जनता पार्टी जळगाव महानगराच्या वतीने क्रांतिसूर्य महात्मा जोतिबा फुले यांची १९१ वी जयंती आज सकाळी ११.०० वाजता फुले मार्केट येथील महात्मा जोतिबा फुले यांच्या पुतळ्यास माल्यार्पण करून साजरी करण्यात आली. याप्रसंगी सुनील माळी व सुभाष शौचे, विशाल त्रिपाठी, महेश जोशी, मनोज भांडारकर, दत्तू जाधव, आशिष वाणी, किशोर बाविस्कर आदी उपस्थित होते. भारतीय जनता पार्टी जळगाव महानगराच्यावतीने ‘समता दिन’ म्हणून साजरा करण्यात येत असल्याचे अनुसूचित जाती जमाती अध्यक्षा ज्योतीताई निंभोरे यांनी सांगितले.

‘सांस्कृतिक पार्श्वभूमी समजून घ्यावी’
महात्मा फुले यांचे कार्य वैश्विक आहे. त्यामुळे ते वैश्विक तत्वचिंतक, विचारवंत आहेत. त्यांचे साहित्य आणि सामाजिक कार्य समजून घेताना त्यांच्या समकालीन सामाजिक, सांस्कृतिक पार्श्वभूमी समजून घेतली पाहिजे, असे प्रतिपादन प्रा. गणेश सूर्यवंशी यांनी व्यक्त केले. मूळजी जेठा महाविद्यालयात महात्मा फुले यांच्या जयंतीनिमित्त आयोजित अभिवादन सभेत ते बोलत होते. सामाजिक शोषणाचे मूळ माणसाच्या अज्ञानात आहे हे ओळखून फुले यांनी शिक्षण क्षेत्रात कार्याची सुरुवात केली, असेही ते म्हणाले. या वेळी उपप्राचार्य डॉ. सुरेश तायडे, डॉ. चंद्रमणी लभाणे, प्रा. देवेंद्र इंगळे, प्रा. संजय हिंगोणेकर, प्रा. के. के. वळवी, डॉ. महेश बडवे व विद्यार्थी उपस्थित होते. सूत्रसंचालन प्रा. योगेश महाले यांनी केले.

शिक्षणशास्त्र कॉलेजमध्ये कार्यक्रम
के. सी. ई. एस. शिक्षणशास्त्र व शारीरिकशास्त्र महाविद्यालय, अध्यापक विद्यालयात क्रांतिसूर्य महात्मा जोतिबा फुले जयंती साजरी करण्यात आली. प्राचार्य डॉ. ए. आर. राणे यांच्या हस्ते पुष्पहार अर्पण करण्यात आले. त्यानंतर अध्यापक विद्यालयाच्या छात्रअध्यापकांनी विविध कार्यक्रम आयोजित केले. कार्यक्रमाचे आयोजन प्रा. डी. डी .भाटेवाल यांनी केले होते.