धुळे, नंदुरबारला साखरेचे वाटप

इंधन दरवाढीविरोधात काँग्रेसचे निषेध आंदोलन

म. टा. वृत्तसेवा, धुळे

पेट्रोल-डिझेलच्या भडकलेल्या दरांमुळे महागाईचा भडका उडाला आहे. त्यामुळे मोदी सरकारच्या नाकर्तेपणाचा निषेध करीत शहरातील श्रीराम पेट्रोल पंपावर युवक काँग्रेस व महिला काँग्रेसच्या वतीने पाकिस्तानहून आयात केलेली साखर वाटून अनोखे निषेध आंदोलन केले.

एकीकडे सीमेपार पाकिस्तानकडून गोळीबार केला जाता आहे. भारतीय जवान त्यात जखमी होऊन अनेक नागरिक जायबंदी झाले आहे. देशप्रेम दाखविणाऱ्या भाजपने महिनाभरासाठी बंद केलेल्या दहशतवादविरोधी कारवाई आणि शस्त्रसंधीच्या घोषणेचा फायदा घेत पाकिस्तान शस्त्रसंधीचे उल्लंघन करीत आहे. मात्र, आपले केंद्र सरकार त्याच पाकिस्तानची साखर आयात करून देशाला कोणता नवीन संदेश देत आहे, असा सवाल यावेळी उपस्थित करण्यात आला. या वेळी जिल्हाध्यक्ष नीलेश काटे, महिला जिल्हाध्यक्षा गायत्री जयस्वाल, उपाध्यक्ष सुरेखा बडगुजर, प्रभा परदेशी, संगीता देसले, बानुबाई शिरसाठ, योगेश विभुते, रफिक शाह, इम्तियाज पठाण, महेश कालेवार आदी उपस्थित होते.

नंदुरबारलाही निषेध
देशाच्या जनतेला मोदी सरकारने सत्तेत आल्यापासून केवळ आश्वासने दिली आहेत. एकीकडे देशातील महिलांवर अत्याचार वाढत आहे. तरुणांची फसवणूक होत असून ते बेरोजगार होत आहेत. शेतमजूर, शेतकरी हैराण होऊन आत्महत्या करीत आहेत. याच्या निषेधार्थ नंदुरबारात शनिवारी सकाळी ११ वाजेला धुळे चौफूलीवर आमदार चंद्रकांत रघुवंशी यांच्या मार्गदर्शनाखाली रास्ता रोको करण्यात आला. या वेळी केंद्र व राज्य सरकारविरोधात घोषणा देत निदर्शने करण्यात आली. आंदोलनात दत्तू चौरे, सभापती विक्रमसिंह वळवी, बी. के. पाटील, डॉ. सयाजी मोरे, कैलास पाटील, रवींद्र पवार, लकी रघुवंशी, कुणाल वसावे, हिरालाल चौधरी, भरत पाटील, पुरुषोत्तम पाटील, अंकुश पाटील, गोपाल पवार, नरेश पवार आदी सहभागी झाले होते.