बालगंधर्व खुले नाट्यगृहाचे ‘मेकओव्हर’

महापौर भोळेंनी दिल्या नूतनीकरणाच्या सूचना
म. टा. प्रतिनिधी, जळगाव
महानगरपालिकेने गठीत केलेल्या वास्तूविशारदांद्वारे शहरातील बालगंधर्व खुले नाट्यगृहाचे बंदिस्त किंवा अन्यप्रकारे नूतनीकरण करण्याच्या सूचना महापौर सीमा भोळे यांनी आयुक्तांना पत्र देऊन केल्या आहेत. त्यामुळे आता गेल्या कित्येक दिवसांपासून नूतनीकरणाच्या प्रतीक्षेत असलेल्या खुल्या नाट्यगृहाचे अखेर ‘मेकओव्हर’ होणार असल्याने जळगावरांनी समाधान व्यक्त केले आहे.
गतकाळापासून जळगाव नगरपालिका अस्तित्वात असताना शहराच्या मध्यस्थित असलेले बालगंधर्व खुले नाट्यगृह हे अनेक गोष्टींचा वारसा आहे. शहरातील नाट्यकलावंत व नाट्यप्रेमी यांसाठी आजही बालगंधर्व खुले नाट्यगृहाचे विशेष महत्त्व आहे. सद्य:स्थितीत नाट्यगृहाची स्थिती जीर्ण झालेली असून, यास्तव शहरातील नाट्यप्रेमी, कलावंत व नागरिकांनी याबाबत अनेकदा नाराजी व्यक्त केलेली आहे. परिणामी, या खुल्या नाट्यगृहाचे नूतनीकरण, सुशोभीकरण करणे अत्यंत गरजेचे बनले आहे. त्यामुळे आता महापौर सीमा भोळे यांनी मनपा आयुक्त डॉ. उदय टेकाळे यांना पत्राद्वारे याबाबतच्या सूचना केल्या आहेत. यामध्ये महापालिकेने गठीत केलेल्या वास्तूविशारदांद्वारे बालगंधर्व खुले नाट्यगृहाचे नूतनीकरण बंदिस्त किंवा कसे सुशोभित करता येईल. याबाबत संबंधितांसोबत चर्चा करून बालगंधर्व खुले नाट्यगृह सुशोभीकरण करण्याची कार्यवाही करावी, अशीही सूचना महापौर भोळे यांनी आयुक्त डॉ. टेकाळे यांना केली.