'दातृत्वाचे देणे' मंगळवारी गुणवंतांच्या हाती

‘मटा हेल्पलाइन’ धनादेशाचे विद्यार्थ्यांना मंगळवारी हस्तांतरण

म. टा. प्रतिनिधी, जळगाव

उज्ज्वल भविष्याचे स्वप्न साकार करण्यासाठी रात्रंदिन केलेला अभ्यास...प्रसंगी अनेक संकटांशी सामना करीत दहावीच्या परीक्षेत मिळवलेले गुण...अशा या गुणवंत विद्यार्थ्यांच्या या मेहनतीला मंगळवारी (दि. ४) दातृत्वाचे बळ मिळणार आहे. ‘मटा हेल्पलाइन’ या उपक्रमाच्या माध्यमातून ‘मटा’च्या वाचकांनी केलेली आर्थिक मदत या विद्यार्थ्यांकडे सुपूर्द केली जाणार आहे.

हा कार्यक्रम डॉ. अण्णासाहेब जी. डी. बेंडाळे महिला महाविद्यालयात दुपारी २ वाजता होणार आहे. महापालिकेचे आयुक्त चंद्रकांत डांगे यांची प्रमुख उपस्थिती राहणार आहे. कार्यक्रमाचे अध्यक्षस्थानी प्राचार्य डॉ. सुभाष राणे यांची राहतील. अत्यंत प्रतिकूल परिस्थितीत शिक्षण घेऊन ज्यांनी दहावीच्या परीक्षेत स्पृहणीय यश मिळवून दाखविले, त्यांना पुढील शिक्षणासाठी मदतीचा हात, योग्य दिशा, भविष्यात उज्ज्वल यशाचा झेंडा रोवण्यात मदत करण्यासाठी ‘महाराष्ट्र टाइम्स’तर्फे हेल्पलाइन हा उपक्रम गेल्या चार वर्षांपासून राबविण्यात येत आहे. महाराष्ट्र टाइम्सच्या वाचकांनी केलेली मदत उपस्थित मान्यवरांच्या हस्ते या गुणवंताना सुपूर्द केली जाणार आहे. सृष्टी महेश वाणी, मोहित अविनाश खाचणे, संकेत दगडू अहिरे हे ‘मटा’ने हेरलेले तीन विद्यार्थी आहेत.