महापौर कोल्हे ‘खाविआ’तर्फे लढणार

म. टा. प्रतिनिधी, जळगाव
जळगाव महापालिकेच्या निवडणुकीत माजी मंत्री सुरेश जैन यांच्यासोबत राहणार आहे. मात्र, मी व माझ्या नगरसेवकांनी शिवसेनेत प्रवेश केलेला नाही. मी खान्देश विकास आघाडीकडून पुढील निवडणूक लढणार आहे, अशी माहिती जळगावमधील मनसेचे गटनेते तथा महापौर ललित कोल्हे यांनी ‘मटा’शी बोलताना दिली.
निवडणूक आयोगाने महापालिका निवडणुकीची घोषणा केल्याच्या पार्श्वभूमीवर जळगावात राजकीय घडामोडींना सुरुवात झाली आहे. महापालिकेचे महापौर ललित काल्हे यांनी या निवडणुकीत शिवसेना नेते व खान्देश विकास आघाडीचे प्रणेते माजी मंत्री सुरेश जैन यांच्यासोबत राहणार असल्याची माहिती दिली. पुढील निवडणूक मनसेकडून लढविणार नसल्याचेही कोल्हे यांनी स्पष्ट केले. महापौर कोल्हे यांच्यासह गेल्या निवडणुकीत १२ नगरसेवक निवडून आले होते. तेव्हापासून कोल्हे यांनी महापालिकेत जैन यांच्याच खान्देश विकास आघाडीला पाठिंबा दिला होता. आघाडीच्या पाठिंब्यानेच ते महापौर झाले. मात्र, मागील निवडणुकीनंतर त्यांनी मनसेच्या सर्व पदांचा राजीनामा दिला होता. तसेच, मनसेच्या कुठल्याही कार्यक्रमात सहभाग न घेता पालिकेत केवळ नावापुरतेच ते मनसेचे नगरसेवक म्हणून वावरत होते.