एजन्सीच्या सक्षमतेबाबत चर्चा

म. टा. प्रतिनिधी, जळगाव

अमृत योजनेंतर्गत प्राप्त झालेल्या तिन्ही निविदा उघडण्यात आल्या. त्यात संतोष इन्फास्ट्रक्चर प्रा. लि. व विजय कन्ट्रक्शन प्रा. लि. ची ४.३२ टक्के दराची सर्वात कमी निविदा होती. त्यामुळे ही निविदा प्रशासनाने मंजूर केली आहे. मात्र, अमृत योजनेचा आढावा घेण्यासाठी मंगळवारी (दि. १४) झालेल्या गटनेत्यांच्या बैठकीत या एजन्सीच्या सक्षमतेबाबत चर्चा करण्यात आली. तसेच याबाबत महाराष्ट्र जीवन प्राधिकरणाच्या अधिकाऱ्यांशी चर्चा करण्याचा निर्णय घेण्यात आला. योजनेबद्दल पदाधिकारी यांना वेळोवेळी माहिती दिली नसल्याबद्दलदेखील गटनेत्यांनी नाराजी व्यक्त केली.

महापौरांच्या दालनात झालेल्या या बैठकीत महापौर नितीन लढ्ढा, खाविआचे रमेश जैन, मविआचे गटनेते नरेंद्र पाटील, भाजपचे सुनील माळी, राष्ट्रवादीचे सुरेश सोनवणे, आयुक्त जीवन सोनवणे, प्रभारी शहर अभियंता सुनील भोळे, प्रकल्प अभियंता योगेश बोरोले उपस्थित होते. या बैठकीत अमृत योजनेचा आढावा घेण्यात आला. योजना मंजूर झाल्यापासून तर निविदा प्रक्रिया करेपर्यंत प्रशासनाकडून योजनेबाबत माहिती पदाधिकारी व नगरसेवकांना देण्यात आली नसल्याने या बैठकीत नाराजी व्यक्त करण्यात आली. यावेळी आयुक्त सोनवणे यांनी योजनेच्या कामांबाबत प्रेझेटेंशन देण्याची तयारी दर्शविली.

अमृत योजनेंतर्गत पाणीपुरवठा योजनेसाठी जैन इरिगेशन प्रा.लि., लक्ष्मी सिव्हील इंजिनिअरींग सर्व्हिसेस, संतोष इन्फ्रास्ट्रक्चर प्रा.लि. व विजय कन्ट्रक्शन प्रा.लि. या तीन निविदा प्राप्त झाल्या होत्या. परंतु, जैन इरिगेशन प्रा.लि. हरकत घेतल्यामुळे एमजेपीकडून तिन्ही निविदा धारकांबाबत तांत्रिक मुद्दे उपस्थित करण्यात आले होते. त्यावर एमजेपीने तिन्ही निविदाधारक पात्र असून असल्याचे सांगितल्यावर निविदा उघडण्यात आल्या होत्या.