स्थायीसह समित्यांच्या जागांबाबत बैठक

खाविआला चार, भाजप दोन तर मनसे, राष्ट्रवादीला एक जागा

म. टा. प्रतिनिधी, जळगाव

महापालिकेच्या स्थायी समितीच्या १६ सदस्यांपैकी ८ सदस्य निवृत्त तर महिला व बालकल्याण समितीचे पुनर्गठन करण्यात येणार आहेत. याबाबत नवीन सदस्य निवडीसाठी गटनेत्यांची गुरुवारी (दि. २१) महापौर ललित कोल्हे यांच्या दालनात बैठक झाली. यावेळी गटनेत्यांनी संख्याबळानुसार सदस्यांची नावे देण्यात आली आहेत.

महापालिकेच्या एकूण आठ सदस्यांची मुदत संपल्याने सदस्य निवृत्त करून मंगळवारी (दि. २६) होणाऱ्या महासभेत नवीन सदस्यांची निवड केली जाणार आहे. महापालिका अधिनियमानुसार दरवर्षी स्थायी समिती सदस्यांपैकी निम्मे सदस्य निवृत्त केले जातात. सर्वाधिक काळ झालेल्या सदस्यांना निवृत्त केले जाते. स्थायी समितीचे आठ सदस्य निवृत्त झाल्याने नगरसचिव अनिल वानखेडे यांनी महापौरांना कळविले होते. त्यानुसार गुरुवारी महापौरांच्या दालनात गटनेत्यांची बैठक बोलविण्यात आली होती.

या बैठकीला महापौर ललित कोल्हे, सभागृह नेते रमेश जैन, खाविआ गटनेते सुनील महाजन, भाजप गटनेते सुनील माळी, जनक्रांतीचे सुनील पाटील उपस्थित होते. गटनेत्यांच्या बैठकीत सभागृहातील सदस्यांच्या संख्येनुसार पक्षांना जागा वाटप करण्यात आली. स्थायी समितीतून खाविआचे शामकांत सोनवणे, दत्तात्रय कोळी, ज्योती इंगळे, गायत्री शिंदे, भाजपचे पृथ्वीराज सोनवणे, विजय गेही, मनसेचे अनंत जोशी, ममता कोल्हे हे सदस्य निवृत्त झाले आहेत.

बालकल्याणचे पुनर्गठन महासभेत

स्थायी समितीमध्ये ८ रिक्त जागांसाठी खान्देश विकास आघाडी ४, भारतीय जनता पक्ष २, महाराष्ट्र नवनिर्माण सेना १, राष्ट्रवादी पक्षाला १ जागा असल्याचे सांगण्यात आले. तसेच महिला व बालकल्याण समितीचे पुनर्गठन आगामी महासभेत करण्यात येणार आहे. महिला व बालकल्याण समितीची सदस्य निवड करताना संख्याबळानुसार जागा वाटप करण्यात आली. महिला व बालकल्याण समितीसाठी खान्देश विकास आघाडी ४, महाराष्ट्र नवनिर्माण सेना २, भारतीय जनता पक्ष २ व राष्ट्रवादी पक्षाला १ जागा असल्याचे सांगण्यात आले.