विसर्जनासाठी मेहरूण तलाव सज्ज

म. टा. प्रतिनिधी, जळगाव

संपूर्ण जळगाव शहरात गणेशोत्सवाची धूम सुरू आहे. प्रशासनानेदेखील आता विसर्जनाच्या दृष्टीने तयारी सुरू केली आहे. यंदा मेहरूण तलावावर दोन स्पॉटवर लहान मूर्ती व मोठ्या मूर्तींचे वेगवेगळ्या ठिकाणी विसर्जनाची व्यवस्था केली जाणार आहे. यंदा प्रथमच चार मोठ्या मूर्ती विसर्जनासाठी चार क्रेन ठेवल्या जाणार आहे.

बांधकाम विभागाकडून विसर्जनमार्गांची दुरुस्तीचे काम हाती घेण्यात आले आहे. मागील आठवड्यात कोर्ट चौक ते दधिची चौक व रथ चौक ते बेंडाळे चौकापर्यंत दुरुस्तीचे काम करून खड्डे बुजविण्यात आले आहेत. आता दधिची चौक ते रथ चौक व रथ चौक ते थेट मेहरूण तलाव रस्त्याच्या दुरुस्तीचे काम सुरू करण्यात आल्याची माहिती शहर अभियंता सुनील भोळे यांनी दिली.

यंदा मेहरूण तलावाच्या गणेश घाटावर केवळ ५ फूट उंचीच्या मूर्तींचे विसर्जन केले जाणार आहे. त्यापेक्षा उंच असलेल्या मूर्तींचे विसर्जन सेंट टेरेसा स्कूलच्या मागील भागात केले जाणार आहे. मोठ्या मूर्तींसाठी चार क्रेनची व्यवस्था केली जाणार आहे. तीन क्रेन प्रत्यक्षात काम करणार आहेत, तर एक क्रेन राखीव राहणार आहे. तर गणेश घाटावर ५ फूटापर्यंत उंच मूर्तींचे विसर्जन तराफ्यावरुन नेवून करणार असून, मेहरूण तलावावर या दोन्ही ठिकाणी जाणारेच रस्ते खुले राहणार आहेत. इतर रस्ते बंद करण्यात येणार असल्याची माहितीदेखील यावेळी देण्यात आली.