मुख्यमंत्र्यांना खडसेंचे साकडे

म. टा. प्रतिनिधी, जळगाव

आपल्याला फसविण्यासाठी अंजली दमानिया यांनी पैशांची ऑफर दिल्याचा आरोप कल्पना इनामदार यांनी केला आहे. याची मुंबर्इ पोलिसांच्या विशेष पथकाकडून चौकशी करण्याची मागणी माजी मंत्री एकनाथ खडसे यांनी मुख्यमंत्री देवेंद्र फडणवीस यांच्याकडे केली आहे. त्यावर मुख्यमंत्र्यांनी संबंधित विभागांना चौकशीच्या सूचना दिल्या आहेत.

माझ्यासह कुटुंबावर बेछूट आरोप करून दमानिया माझी बदनामी करत आहेत. त्यांच्या प्रत्येक आरोपाचे वेळोवेळी मी खंडन केले आहे. तरीसुद्धा त्यांच्याकडून आरोप सुरूच आहेत. समाजात बदनामी करण्यासाठी दमानिया हे आरोप करीत असल्याचे खडसे यांनी पत्रात म्हटले आहे. काही दिवसांपूर्वी कल्पना इनामदार यांनी एक पत्रकार परिषद घेऊन खडसेंना फसविण्यासाठी दमानिया यांनी प्रलोभन दिल्याचा आरोप केला होता. या आरोपांची चौकशी करण्याची मागणी खडसे यांनी मुख्यमंत्र्यांकडे केली आहे.