तपासाधिकारी बदलासाठी दबाव

दमानियासह संशयितांना वाचविण्याचा प्रयत्न; पोलिस अधीक्षकांवर आमदार खडसेंचा आरोप

म. टा. प्रतिनिधी, जळगाव

खोटे डीडी व धनादेश कायकोर्टात सादर केल्याप्रकरणी अंजली दमानिया, गजानन मालपुरे यांच्यासह ६ जणांविरुद्ध गुन्हा दाखल करण्यात आला आहे. या प्रकरणी दमानिया यांच्या मागणीवरून पोलिस अधीक्षकांवर आर्थिक किंवा एखाद्या मोठ्या व्यक्तीचा दबाव आल्याने त्यांनी तपासाधिकारी बदलविल्याचा खळबळजनक आरोप माजी मंत्री आमदार एकनाथ खडसे यांनी शनिवारी (दि. २३) पत्रकार परिषदेत केला.

या प्रकरणी पोलिस अधीक्षकांकडून गुन्ह्यातील संशयित आरोपी दमनिया व त्यांच्या साथीदारांना वाचविण्याचा प्रयत्न होत असल्याने या विरोधात आपण हायकोर्टात जाणार असल्याचेही त्यांनी सांगितले.

या वेळी खडसे यांनी सांगितले, माझ्या विरोधात दमानिया यांनी दाखल केलेल्या जनहित याचिकेत जोडलेल्या कागदपत्रांमधील डीडी व धनादेश खोटे असल्याचे यापूर्वीच तत्कालीन पोलिस अधीक्षकांच्या चौकशीत निष्पन्न झाले आहे. याबाबत मी पोलिसात केलेल्या तक्रारीला पोलिस प्रशासनाकडून टाळाटाळ होत होती. विशेषत: पोलिस अधीक्षक दत्तात्रय कराळे जळगाव जिल्ह्यात बदलून आल्यापासून हा प्रकार सुरू होता. त्यामुळे मुक्तार्इनगर कोर्टात तक्रार केली. त्यानंतर कोर्टाने पोलिसांना गुन्हा दाखल करून तपास करण्याचे आदेश दिले, असेही खडसे यांनी सांगितले.

मोठे मासे समोर येणार
मुक्तार्इनगरचे तपासाधिकारी पोलिस निरीक्षक कडलग यांनी तपास सुरू करून चार जणांना चौकशीसाठी ताब्यात घेतेले. या प्रकरणी त्यांच्या चौकशीत अंजली दमानिया यांचेच नाव पुढे आल्याचेही खडसे म्हणाले. त्यानंतर ज्या बँकेचे खोटे डीडी होते. तेथील काही जणांनाही पोलिसांनी अटक केली असून, त्यांना ७ दिवसांची पोलिस कोठडी देण्यात आली आहे. त्यांच्या नातेवाइकांनी आपल्याला भेटून अनेकांच्या नावाचे खोटे धनादेश केल्याची माहिती दिल्याचेही आमदार खडसे यांनी स्पष्ट केले. या चौकशीत अजून अनेक मोठे मासे पोलिसांच्या हाताला लागण्याची चिन्हे निर्माण झाली आहेत.

संशयास्पदरित्या बदलले तपासाधिकारी
एकीकडे तपास प्रगतीवर असतानाच ज्यांच्यावर गुन्हा दाखल आहे, त्या अंजली दमानिया यांनी पोलिस अधीक्षक कराळे यांना मेल करून तपासाधिकारी यांच्याबाबत तक्रार करून त्यांना बदलण्याची मागणी केली. त्यांच्या सूचनेनुसार पोलिस अधीक्षकांनी लगेच निरीक्षक यांची बदली करून तपास सहाय्यक निरीक्षक दर्जाच्या अधिकाऱ्याकडे दिला. त्यामुळे पोलिस अधीक्षकांची ही भूमिका संशयास्पद असून, आर्थिक किंवा मोठ्या व्यक्तीच्या दबावातून ही कार्यवाही केल्याचा आरोप खडसे यांनी केला. संशयित आरोपीच्या सूचनेवरून तपासाधिकारी बदलल्याची ही खूप दुर्मिळ व बेकायदेशीर घटना असल्याचे आमदार खडसे म्हणाले.

एसपींचा गुन्हेगारांना पाठींबा
जिल्ह्याचे पोलिस अधीक्षक अशाप्रकारे गुन्हेगारांना पाठीशी घालत आहे. त्यांनी कायदा खुंटीला टाकला असून, अंजली दमानिया पोलिसांना आव्हान देत असतानादेखील त्यांना अटक का होत नाही, असा सवाल आमदार खडसे यांनी उपस्थित केला. तसेच दमानिया यांना अटक होत अधिक्षक त्यांना वाचविण्याचा प्रयत्न करीत असल्याचेही खडसे यांनी म्हटले. याबाबत मुख्यमंत्र्यांशी चर्चा करणार असल्याचेही ते म्हणाले. अमळनेर सध्या अवैध धंद्याचे माहेरघर झाल्याचेही ते म्हणाले.

प्रकरण दडपल्याने एसपींना प्रमोशन मिळणार
मी एसपी कराळे यांच्या बदलीची मागणी करणार नाही. हे प्रकरण दडपल्याने त्यांना प्रमोशन मिळणार असल्याचा टोलाही खडसेंनी लगावला. एसपी कराळे यांच्या कार्यक्षमतेमुळे जळगावात अवैध धंदे बोकाळल्याचा उपाहास त्यांनी केला. जळगाव जिल्ह्यात मुलांना मारहाण, समता नगरातील मुलीवर अत्याचार करून हत्या इतरही घटना घडत असताना एसपी कराळे तिकडे लक्ष न देता या गुन्ह्यावरच लक्ष ठेवून असल्याचे त्यांनी सांगितले.

मला अक्कल शिकवू नये
जिल्हाध्यक्षांच्या राजीनाम्याच्या वक्तव्याबाबत आमदार खडसे यांनी यावेळी खुलासा केला. ते म्हणाले, भाजपचे जिल्हाध्यक्ष उदय वाघ यांनी चुकीचे काम केले नसेलच पण आरोपांची चौकशी होर्इपर्यंतच त्यांनी राजीनामा द्यावा. भाजप नैतिकमूल्य असलेला पक्ष असून, मीही राजीनामा दिला होता. विशेष म्हणजे, ही बाब पक्ष शिस्तीप्रमाणे प्रदेशाध्यक्ष दानवे यांच्याशी बोललो होतो. तसेच या पत्रकार परिषदेसाठीही त्यांनी परवानगी घेतल्याचे आमदार खडसेंनी स्पष्ट केले. मला ४० वर्षे भाजप पक्षात झाले त्यामुळे शिस्त मलाही माहिती आहे. त्यामुळे मला कुणी अक्कल शिकवू नये, असेही ते म्हणाले. माझ्याविरुद्धच्या षडयंत्रात एका मंत्र्याचा हात असल्याचा आरोपाबाबत, मुख्यमंत्री फडणवीस यांच्याकडे तक्रार केल्याचेही त्यांनी सांगितले.