मोबाइल चोरणारी टोळी गजाआड

म. टा. प्रतिनिधी, जळगाव

जळगावसह अकोला, नगर, नांदेड, नाशिक या रेल्वे ट्रॅकवरील शहरांमध्ये आठवडे बाजाराच्या दिवशी जाऊन खाली बसून भाज्या घेणाऱ्या ग्राहकांचे किमती मोबाइल चोरणारी झारखंडची अट्टल टोळी जळगाव पोलिसांनी उघड केली. यात तीन अल्पवयीनसह सहा जणांना गजाआड केल्याची माहिती डीवायएसपी सचिन सांगळे यांनी दिली.

जळगाव शहरातील पिंप्राळा परिसरात बुधवारी (दि. २२) आठवडे बाजार होता. या बाजारात शहादा तालुक्यातील प्रदीप दामू पाटील आले होते. त्यांच्या खिशातील मोबाइल चोरीस गेला. त्याचा तपास करताना रामानंद पोलिस ठाण्याचे प्रदीप चौधरी, अतुल पवार व सागर तडवी यांनी माग काढत या टोळीपर्यंत पोहचले. पथकाने भुसावळ व अकोल्याला जाऊन चांद मोहम्मद खाजाउद्दीन, खुरसीद आलम शेख मंजूर व शेख जुलफान शेख मुरसेद यांच्यासह तीन अल्पवयीनांना ताब्यात घेतले. त्यांच्याकडून जळगावातून चोरलेले तीन मोबाइल हस्तगत करण्यात आले. चोरी केलेले मोबाईल घेवून अकोला जायचे, १० मोबाइल झाले की, ते बंगळुरू, ओडिशाला नेऊन विकत असल्याची माहितीही सांगळेंनी दिली. या टोळीने आतापर्यंत ३०० ते ३५० मोबाइल चोरल्याची शक्यता असून, राज्यातील मोबाइल चोरीचे अनेक गुन्हे उघडकीस येणार आहेत.