मुंबई विद्यापीठाला ‘खो-खो’चे विजेतेपद

म. टा. प्रतिनिधी, जळगाव

कवयित्री बहिणाबाई चौधरी उत्तर महाराष्ट्र विद्यापीठात झालेल्या पश्चिम विभागीय आंतरविद्यापीठ खो-खो (महिला) स्पर्धेचे विजेतपद मुंबई विद्यापीठाने तर सावित्रीबाई फुले पुणे विद्यापीठाने उपविजेतेपद पटकावले. शिवाजी विद्यापीठ कोल्हापूर तिसऱ्या तर यजमान कवयित्री बहिणाबाई चौधरी उत्तर महाराष्ट्र विद्यापीठ चौथ्यास्थानी राहिले. कुलगुरू प्रा. पी. पी. पाटील यांच्या उपस्थितीत गुरुवारी (दि. २२) या स्पर्धेचा समारोप जल्लोषात झाला.

पाच राज्यातील ४८ विद्यापीठांनी या स्पर्धेत सहभाग घेतला. गुरुवारी कुलगुरू प्रा. पी. पी. पाटील, यांच्या प्रमुख उपस्थितीत स्पर्धेचा समारोप झाला.
मुंबई, पुणे, कोल्हापूर आणि जळगाव या चार विद्यापीठांनी इतर विद्यापीठांवर मात करीत साखळी स्पर्धा गाठली होती. साखळी स्पर्धेत या चारही विद्यापीठांच्या आपसांत प्रत्येकी तीन लढती झाल्या. यामध्ये मुंबई विद्यापीठाने तीनही लढती जिंकून स्पर्धेचे अजिंक्यपद प्राप्त केले. सावित्रीबाई फुले पुणे विद्यापीठाने दोन लढती जिंकून उपविजेतेपद प्राप्त केले. शिवाजी विद्यापीठ कोल्हापूरने तीनपैकी एक लढत जिंकून तिसरे स्थान प्राप्त केले तर यजमान कवयित्री बहिणाबाई चौधरी उत्तर महाराष्ट्र विद्यापीठाचा तीनही लढतींमध्ये पराभव झाला. हे चारही संघ राष्ट्रीय पातळीवरील स्पर्धेसाठी पात्र ठरले आहेत. गुरुवारची उत्तम खेळाडू धनश्री बोरसे (कोल्हापूर) ही ठरली. उत्कृष्ट आक्रमक खेळाडू म्हणून काजल भोर (पुणे), उत्कृष्ट संरक्षक म्हणून ऐश्वर्या सावंत (मुंबई) यांना पुरस्कार देण्यात आला. या संपूर्ण स्पर्धेची उत्कृष्ट खेळाडू मुंबईची प्रियंका भोपी ठरली.